الەمدەگى ەڭ جاسى ۇلكەن مەملەكەت باسشىسى 92 جاستاعى كامەرۋن پرەزيدەنتى پول بييا جاڭا جەتى جىلدىق مەرزىمگە قايتا سايلاندى، دەپ حابارلايدى "ادىرنا" ۇلتتىق پورتالى.
ەلدىڭ كونستيتۋتسيالىق سوتىنىڭ حابارلاۋىنشا، بييا سايلاۋدا 53,66% داۋىس جيناعان.
پول بييا كامەرۋندى 1982 جىلدان بەرى باسقارىپ كەلەدى. بۇل – ونىڭ سەگىزىنشى پرەزيدەنتتىك مەرزىمى بولماق. سايلاۋ 12 قازاندا وتكەن، ال ونىڭ قورىتىندىسى دۇيسەنبى كۇنى رەسمي تۇردە جاريالاندى.
ناۋقان كەزىندە بييا بار بولعانى ءبىر ميتينگ وتكىزگەن. ۇگىت كەزەڭىنىڭ ون كۇنىن ول ەۋروپادا جەكە ساپارمەن وتكىزگەن.
سايلاۋعا تاعى توعىز كانديدات قاتىسقان، ولاردىڭ ەكەۋى بييانىڭ سەرىكتەستەرى.
باستى قارسىلاس سانالاتىن وپپوزيتسيا جەتەكشىسى موريس كامتو بيىلعى سايلاۋعا قاتىسا المادى. كونستيتۋتسيالىق سوت ونى تىركەۋدەن باس تارتقان. بۇل شەشىم قوعامدا ادىلەتسىزدىك رەتىندە قابىلداندى.
وپپوزيتسيالىق كانديدات يسسە چيروما باكاري ءوزىن جەڭىمپاز دەپ جاريالاعانىمەن، رەسمي مالىمەت بويىنشا ول 35,2% داۋىس جيناعان. ونىڭ جاقتاستارى سايلاۋ ناتيجەلەرىن بۇرمالاۋ مەن زاڭ بۇزۋشىلىقتار بولعانىن ايتادى.
كامەرۋن دياسپوراسى نەگىزىنەن چيرومانى قولداعان: ازيا مەن تاياۋ شىعىستا 68%، ەۋروپادا 62%، اقش-تا 66% داۋىس وعان بەرىلگەن.
ەل ىشىندە ينفلياتسيا، جۇمىسسىزدىق پەن سىبايلاس جەمقورلىققا نارازىلىق ارتىپ كەلەدى.
حالىقتىڭ 60%-دان استامى – 25 جاسقا تولماعان جاستار. ال 15 پەن 35 جاس ارالىعىنداعى ازاماتتاردىڭ 40%-ى جۇمىسسىز.
ساياساتتانۋشىلاردىڭ پىكىرىنشە، پول بييانىڭ باستى ماقساتى – بيلىكتى ساقتاپ قالۋ. ولار ونىڭ 1984 جىلى بولعان ءساتسىز توڭكەرىستەن كەيىن بيلىككە بار كۇشىن سالعانىن ايتادى.
