اتىراۋ قالاسىندا جۇبايىن كامەلەتكە تولماعان قىزىنىڭ كوزىنشە اسا قاتىگەزدىكپەن ولتىرگەن 63 جاستاعى ەر ادامعا قاتىستى سوت ۇكىمى شىقتى، دەپ حابارلايدى "ادىرنا" ۇلتتىق پورتالى.
ول 15 جىلعا باس بوستاندىعىنان ايىرىلدى. ءىس ماتەريالدارىنا سايكەس، قايعىلى وقيعا 16 ناۋرىزعا قاراعان ءتۇنى نۇرسايا شاعىن اۋدانىندا بولعان. تەرگەۋ مالىمەتىنشە، وتباسىلىق جانجالدان كەيىن 58 جاستاعى ايەل 12 جاستاعى قىزىمەن بىرگە ۇيىقتاپ جاتقان. وسى كەزدە ەر ادام اسۇيدەن پىشاق الىپ كەلىپ، جۇبايىنا بىرنەشە مارتە سوققى جاساعان.
اناسىنىڭ ايقايىنان ويانعان قىز اكەسىنەن توقتاۋىن سۇراعانىمەن، ايەل العان جاراقاتتارىنان وقيعا ورنىندا كوز جۇمعان. ساراپتاما قورىتىندىسىنا سايكەس، مارقۇمنىڭ دەنەسىنەن 11 پىشاق جاراقاتى انىقتالعان. سوت وتىرىسىندا قىلمىستىڭ قىزعانىش سالدارىنان جاسالعانى بەلگىلى بولدى. ايىپتالۋشى جۇبايىن بىرنەشە جىل بويى وپاسىزدىق جاسادى دەپ كۇدىكتەنىپ، ونىڭ ءجۇرىپ-تۇرۋىن باقىلاپ وتىرعان. الايدا تەرگەۋ بارىسىندا بۇل كۇدىككە قاتىستى ەشقانداي دالەل انىقتالماعان.
سوتتالۋشى ءوز كىناسىن تولىق مويىنداعانىمەن، قىلمىس جاساعان ءساتتى ەسىنە تۇسىرە المايتىنىن جانە سول كەزدە ءوز ارەكەتىن باقىلاماعانىن ايتقان. الايدا سوت-پسيحولوگيالىق-پسيحياتريالىق ساراپتاما ونىڭ قىلمىس كەزىندە ءوز ارەكەتىنىڭ ءمانىن ءتۇسىنىپ، ءوزىن-ءوزى باسقارا الاتىن جاعدايدا بولعانىن كورسەتتى.
سوت ەر ادامنىڭ ارەكەتىن ەرەكشە قاتىگەزدىكپەن جاسالعان ادام ءولتىرۋ دەپ تانىپ، ونى 15 جىل مەرزىمگە باس بوستاندىعىنان ايىرۋ جازاسىنا كەستى.
سونىمەن قاتار سوت شەشىمىمەن سوتتالعان ازاماتتان مارقۇمنىڭ اپكەسىنىڭ پايداسىنا مورالدىق زياندى وتەۋ ءۇشىن 5 ميلليون تەڭگە ءوندىرىلدى.
قايعىلى وقيعادان كەيىن ەرلى-زايىپتىلاردىڭ 12 جاستاعى قىزى قامقورشىلىق ورگاندارىنىڭ قاراۋىنا بەرىلگەن.
