10–13 شىلدە ارالىعىندا بەلارۋس رەسپۋبليكاسىندا «ۆيتەبسكىدەگى سلاۆيان بازارى» XXXIV حالىقارالىق ونەر فەستيۆالى ءوتتى. ەلىمىزدىڭ اتىنان بايقاۋعا جەتىسۋ وبلىستىق دانەش راقىشەۆ اتىنداعى فيلارمونياسىنىڭ ءانشىسى الماگۇل باتتاليەۆا قاتىستى، دەپ حابارلايدى «ادىرنا» ءتىلشىسى.
فينالدا ءانشى «ۆەچنوست» كومپوزيتسياسىن ورىنداپ، كورەرمەندى تالانتىمەن ءتانتى ەتتى. ونەرپاز ەكى بايقاۋ كۇنىنىڭ قورىتىندىسى بويىنشا 137 ۇپاي جيناپ، فەستيۆالدىڭ گران-پري جۇلدەسىن جەڭىپ الدى.
الماگۇل باتتاليەۆا – الماتى قالاسىنىڭ تۋماسى. ول 14 جاسىندا پ. ي. چايكوۆسكي اتىنداعى الماتى مۋزىكالىق كوللەدجىنە وقۋعا تۇسكەن. سونىمەن قاتار ءانشى بىرنەشە اسپاپتى – اككوردەون، فورتەپيانو جانە ۋكۋلەلەنى ەركىن مەڭگەرگەن. بۇعان دەيىن ول «جاس قانات – 2023» فەستيۆالى، «الماتىم جۇرەگىمدە» حالىقارالىق بايقاۋى سىندى بەدەلدى مۋزىكالىق جارىستاردا جوعارى دەڭگەيدە ونەر كورسەتىپ، كاسىبي شەبەرلىگىن بىرنەشە مارتە دالەلدەگەن.
