2022 جىلدىڭ قىركۇيەك ايىنىڭ سوڭىنا دەيىن تاعى 236 ديرەكتور اۋىستىرىلادى. بۇل تۋرالى وقۋ-اعارتۋ مينيسترلىگى مالىمدەدى، دەپ حابارلايدى “ادىرنا” ۇلتتىق پورتالى.
«ءبىلىم بەرۋ سالاسىندا 10 مىڭنان استام مەملەكەتتىك ۇيىم بار. كوپتەگەن باسشىلاردا مەرزىمسىز ەڭبەك شارتتارى بار. وسىعان بايلانىستى 10-15 جانە ودان دا كوپ جىل ءبىر ۇيىمدا جۇمىس ىستەيتىندەر از ەمەس. ارينە، ولاردىڭ اراسىندا ءوز ءىسىن بىلەتىن جانە ءبىلىم بەرۋ ۇيىمىنىڭ دامۋىنا ەلەۋلى ۇلەس قوسىپ جۇرگەن باسشىلار دا بار. بىراق تاجىريبە كورسەتكەندەي، وكىنىشكە قاراي، مىسالى، 10-15 جىل نەمەسە ودان دا كوپ ۋاقىت بويى لاۋازىمدىق قىزمەتتە وتىرعاندار باستاما كوتەرۋدى، موتيۆاتسيانى جانە دامۋعا دەگەن ۇمتىلىسىن جوعالتىپ، كەمشىلىكتەرگە ۇيرەنىپ كەتەدى جانە ونى ۇيرەنشىكتى تۇردە قابىلدايدى»، – دەدى قازاقستاننىڭ وقۋ-اعارتۋ مينيسترلىگى.
بۇعان قوسا، ۆەدومستۆو ءبىلىم بەرۋ مەكەمەلەرىنىڭ باسشىلارىن روتاتسيالاۋدىڭ قاعيدالارى بارىن ەسكە الدى. اتاپ ايتقاندا، ءبىر ءبىلىم بەرۋ ۇيىمىندا 4 نەمەسە 7 جىلدان استام ۋاقىت جۇمىس ىستەگەن باسشىلار روتاتسياعا تۇسەدى.
«بۇل رەتتە وسى ۇيىمداعى لاۋازىمعا تاعايىندالعان كۇننەن باستاپ 4 جىل اتقاراتىن لاۋازىمداعى ءبىرىنشى باسشى ۇسىنىلعان روتاتسيادان باس تارتا الادى جانە تيىسىنشە ەڭبەك شارتى شەڭبەرىندە ءوز جۇمىسىن جالعاستىرا الادى. الايدا، ەگەر باسشى ءبىر ۇيىمدا 7 جىلدان استام ۋاقىت جۇمىس ىستەسە، وندا ول مىندەتتى تۇردە روتاتسيالانادى»، – دەپ قوستى مينيسترلىك.
مينيسترلىك مالىمەتىنشە، بيىل 400-دەن استام مەكتەپ ديرەكتورى اۋىسقان، ونىڭ ىشىندە ەڭ كوبى شىمكەنت، تۇركىستان مەن قاراعاندى وبلىستارىندا. 2022 جىلدىڭ قىركۇيەك ايىنىڭ سوڭىنا دەيىن تاعى 236 ديرەكتور اۋىسادى.
