قىرعىزستاننىڭ شامالدى-ساي ەلدى مەكەنىندە ءشوپ اراسىنان الىپ كەسىرتكەنىڭ سيرەك كەزدەسەتىن ءتۇرى تابىلدى، دەپ حابارلايدى "ادىرنا" ۇلتتىق پورتالى.
24kg مالىمەتىنشە، جالال-اباد وبلىسىنا قاراستى شامالدى-ساي ەلدى مەكەنىنىڭ تۇرعىنى ءشوپ شابۋ كەزىندە توسىن جايتقا تاپ بولدى. كادىمگى جۇمىس كۇنى ول تيەلگەن شوپتەن الىپ كەسىرتكەنى — ۆاراندى تاۋىپ العان.
مامانداردىڭ ايتۋىنشا، بۇل – سۇر نەمەسە شۇبار ۆاران بولۋى مۇمكىن. اتالعان كەسىرتكە تۇرلەرى قىرعىزستاننىڭ وڭتۇستىگىندە سيرەك كەزدەسەدى. اسىرەسە اۋا رايى ىسىعان كەزدە ولاردىڭ بەلسەندىلىگى ارتا تۇسەدى.
ۆاران — كەسىرتكەنىڭ ءىرى ءارى سيرەك كەزدەسەتىن ءتۇرى. دەنەسى ۇزىن، قۇيرىعى جۋان، تىرناقتارى وتكىر، ال ءتىلى جىلان سەكىلدى ەكى ايىر بولادى. تابيعاتتا ولار ۇساق جاندىكتەرمەن، كەمىرگىشتەرمەن جانە كەيدە ولەكسەمەن قورەكتەنەدى.
ەكولوگ ماماندار وسىنداي جاعدايعا تاپ بولعان ازاماتتارعا قورىقپاۋعا كەڭەس بەرەدى.
«كەسىرتكەنىڭ بۇل ءتۇرى ادامعا قاۋىپ توندىرمەيدى، تەك وزدەرىن قورعاۋ ماقساتىندا عانا ارەكەت ەتۋى مۇمكىن. مۇنداي سيرەك كەزدەسەتىن جانۋارلار تابيعاتتاعى بيوارتۇرلىلىكتىڭ ءبىر بولىگى»، – دەيدى ماماندار.
