بۇگىن، 11 شىلدەدە ءاسيا اقانوۆا باسقا لاۋازىمعا اۋىسۋىنا بايلانىستى الماتى قالاسى قوعامدىق دەنساۋلىق ساقتاۋ باسقارماسىنىڭ باسشىسى قىزمەتىنەن بوساتىلدى. بۇل اقپاراتپەن وڭتۇستىك استانا اكىمدىگى ءبولىستى، دەپ حابارلايدى "ادىرنا".
اقانوۆا قالالىق قوعامدىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى بولىپ 2024 جىلدىڭ قاراشا ايىندا الماتى اكىمى ەربولات دوساەۆتىڭ وكىمىمەن تاعايىندالعان بولاتىن.
ءاسيا اقانوۆا دارىگەرلەر وتباسىندا تۋىپ-وسكەن. «بولاشاق» باعدارلاماسىنىڭ تۇلەگى بولا وتىرىپ، University College London (2013) جانە اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىن (2015), "جالپى مەديتسينا" ماماندىعى بويىنشا دوكتورانتۋرانى (2016) بىتىرگەن. سونداي-اق، قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىندا جەرگىلىكتى جانە مەملەكەتتىك باسقارۋ ماماندىعى بويىنشا وقۋىن اياقتادى (2024). ىسكەرلىك اكىمشىلەندىرۋ ماگيسترى دارەجەسىنە يە.
ءاسيا اقانوۆا ەڭبەك جولىن 2011 جىلى قازۇمۋ وتباسىلىق مەديتسينا كافەدراسىنىڭ زەرتحاناشىسى جانە ادىسكەرى، دوتسەنتى، كەيىن كافەدرا مەڭگەرۋشىسى بولىپ باستاعان. 2018-2020 جىلدار ارالىعىندا الماتىدا بەلسەندى ۇزاق ءومىر ءسۇرۋ ورتالىعىنىڭ اشۋمەن جانە وعان باسشىلىق جاساۋمەن اينالىستى. 2022 جىلدان باستاپ قازىرگى ۋاقىتقا دەيىن ول VIII سايلانعان الماتى قالاسى ءماسليحاتىنىڭ دەپۋتاتى بولىپ تابىلادى. سونىمەن قاتار، بۇگىنگى كۇنگە دەيىن ءال-فارابي اتىنداعى قازۇۋ وتباسىلىق مەديتسينا كافەدراسىنىڭ دوتسەنتى رەتىندە عىلىمي-پەداگوگيكالىق قىزمەتىن جالعاستىرۋدا.
