"انام شولپان بايتۇرسىنقىزى كورىنگەننىڭ جەر تولەسىندە كۇن كەشتى" - ا. بايتۇرسىنوۆتىڭ ۇرپاعى باسپانالى بولدى

5863
Adyrna.kz Telegram
قازاقتىڭ ۇلى اعارتۋشىسى ءارى الاش قايراتكەرى احمەت بايتۇرسىنۇلىنىڭ جيەن نەمەرەسى، تەكتىنىڭ ۇرپاعى ايمان بايسالوۆا ەگدە تارتقان شاعىندا باسپانالى بولدى. احاڭ ۇرپاعىنىڭ الماتىدان پاتەر الۋىنا الاشتانۋشى عالىم ايگۇل ىسماقوۆا باس بولىپ، سەناتور التىنبەك نۇقۇلى ۇسىنىسقا قولداۋ تانىتقان. بۇل جايلى "ادىرنا" ۇلتتىق پورتالى حابارلادى. 
- اللاعا شۇكىر، بۇگىن قاسيەتتى دۇيسەنبى كۇنى الماتىدا كەرەمەت جاڭالىق بولدى. پرەزيدەنت ق.ك. توقاەۆتىڭ قولداۋىمەن اقىمەت اتانىڭ جيەن نەمەرەسى ايمان اپايىمىز جاڭا ءۇي الدى. “العاش رەت جاڭا باسپاناعا” كىردىم دەيدى اپاي كوزىنە جاس ىركىلە. ماسەلەنى كوتەرگەن ايگۇل ىسماقوۆا اپايىما، ماقالا جاريالاعان “ەگەمەن قازاقستان” گازەتىنە، پروبلەماعا بەي-جاي قاراماي، ارقاشان ءوز كومەگىن ۇسىنعان سەناتور التىنبەك نۇقۇلىنا اللانىڭ نۇرى جاۋسىن، - دەگەن قۋانىشتى جاڭالىقتى قازاقتىڭ عالىم قىزى انار بەكمىرزا حابارلادى.
بۇعان ايمان بايسالوۆانىڭ ءوزى:

 "اتام احمەت بايتۇرسىنۇلىنىڭ وزىنە تيەسىلى ءۇيى ەشقاشان بولماعان، انام شولپان بايتۇرسىنقىزى كورىنگەننىڭ بوساعاسىندا، كەيدە جەر تولەسىندە قۋعىن-سۇرگىندە ءومىر كەشتى. اينالايىن پرەزيدەنت قاسىم-جومارت كەمەلۇلى ماعان بۇگىن سۋ جاڭا، جىلى ءۇي سىيلادى. اتانىڭ ارۋاعىن سىيلاپ، مەنىڭ باسىمداعى جاعدايعا الاڭداپ، قامقورلىق تانىتقانىڭا راقمەت. الاش جولىن ارداق تۇتقان ەلدىڭ بولاشاعى زور دەپ سەنەمىن. ەلىمە، قازاق حالقىنا جارقىن بولاشىق تىلەيمىن!" -دەپ العىس ءبىلدىردى.

ايمان بايسالوۆا - احمەت بايتۇرسىنۇلىنىڭ ءتول جيەنى. 1936 جىلى تۋعان. قازىرگى احمەت بايتۇرسىنۇلى مۋزەي-ۇيىندە 1 جىل 7 ايىنا دەيىن ناعاشىسى اتاسى احمەت پەن اجەسى بادريسافا، ءوزىنىڭ اكە-شەشەسىمەن بىرگە تۇرعان. احاڭنىڭ جيەنى ءوزىن اتاسى موينىنا مىنگىزىپ، تالاي ەركەلەتىپ ويناتقانىن ايتادى. ول تۋرالى اناسى شولپان اپامىز ايتىپ بەرگەن ەكەن. كەيىندەۋ، شامامەن 1940 جىلى شەشەسى شولپاننىڭ جۇمىسىنا بايلانىستى باقاناسقا كوشكەن.

ايمان اپامىز احمەت بايتۇرسىنۇلىنىڭ جيەنى ەكەنىن، تەك 1991 جىلى بىلگەنىن بىلايشا ەسىنە الدى:

«اباي داڭعىلى مەن ماسانچي كوشەسىنىڭ قيلىسىنداعى تەمىرجول اۋرۋحاناسىندا جۇمىس ىستەۋشى ەدىم. انام شولپان كەلىپ، جۇمىستان سۇراپ الىپ، تورعايعا ۇشىپ كەتتىك. سول كەزدە امانقوس، عاريفولالار جاس ەدى (مەكتەپتەگى مەن انەستى ايتىپ وتىر. – رەد.). ۇشاقتا تۇرسىنبەك كاكىشەۆ تە بولدى. مەن ول كەزدە ولاردىڭ ءبىرىن دە تانىمايتىن ەدىم. سولاي تەكتى تۇلعانىڭ ۇرپاعى ەكەنىمىزدى بىلدىك»، - دەپ كۇرسىندى اپامىز.

"ادىرنا" ۇلتتىق پورتالى

پىكىرلەر