جاقىندا ەلىمىزدە بەتتى جاۋىپ تۇراتىن كيىم تۇرلەرىن قوعامدىق ورىندا كيۋگە تىيىم سالاتىن ەرەجە قابىلداندى. بۇل جالپى قاۋىپسىزدىكپەن بايلانىستى شەشىم ەدى. قازاقستان بۇل شەشىمدى كەشىگىپ قابىلدادى دەپ ايتسام بولادى. سەبەبى ورتالىق ازيا ەلدەرى بىزگە دەيىن قابىلداعان بولاتىن.
ءبىرىنشى بولىپ وزبەكستان قابىلدادى. وتكەن جىلى تاجىكستان دا وسىنداي ارنايى زاڭدى قابىلداپ، راحمون قول قويدى. بيىل قىرعىزستاندا دا وسىنداي زاڭ قابىلداندى. ارنايى رەيدتەر ءوتىپ جاتىر. ياعني قوعامدىق ورىنداردا بەتتى تۇتاس جاۋىپ تۇراتىن، بۇركەمەلەيتىن كيىم تۇرلەرىن كيۋگە تىيىم سالىنۋدا. تۇركىمەن ەلىندە دە وسىعان ۇقساس ەرەجەلەر بار.
دەگەنمەن ورتالىق ازياعا قاراعاندا وزگە مەملەكەتتەر ءبىرىنشى قيمىلدادى. ولاردىڭ ىشىندە ەۋروپا ەلدەرى دە بار. 2010 جىلى فرانتسيادا قوعامدىق ورىنداردا بەتتى جاۋىپ تۇراتىن كيىمدەردى كيۋگە تىيىم سالىنا باستادى. وعان ارنايى جاۋاپكەرشىلىك تە ەنگىزىلدى. كەيىن بەلگيادا وسىعان ۇقساس شەشىم شىقتى. ونى ەۋروپالىق سوت ماقۇلدادى. دانيا، گەرمانيا، اۋستريا، بولگاريا، نيدەرلاندى ىسپەتتەس ەلدەردە دە بەتتى جاۋىپ تۇراتىن كيىم ۇلگىلەرىن كيۋگە تىيىم سالاتىن ەرەجەلەر ەنگىزىلۋدە. اتالمىش مەملەكەتتەردە قاۋىپسىزدىك ماسەلەسى بار. ءجيى ميتينگتەر وتەدى. بەتتى تولىق جاۋىپ، ءتۇرلى بۇزاقىلىق جاسايتىندار سانى ارتقان. ولار كولىكتەردى ورتەيدى، دۇكەندەردى تونايدى، توبەلەسەدى. سول ءۇشىن دە ارنايى ەرەجەلەر ەنگىزىلىپ، بەتتى تۇتاس جاۋىپ تۇراتىن كيىمدەرگە تىيىم سالىنۋدا. قاۋىپسىزدىك ماقساتىندا!
بىزدە دە سولاي. بۇل قاۋىپسىزدىك ماقساتىنداعى شارا دەپ سانايمىن. بىرەۋدىڭ قۇقىعىنا قول سۇعۋ ەمەس بۇل. قوعامدىق ورتادا ادامداردىڭ ءجۇزىن تانۋ ءۇشىن جاسالعان شەشىم عوي. كىم نە كيەم دەسە دە ءوزى بىلەدى. بىراق ادامنىڭ كيىمى قوعامدىق ورتاداعى بەلگىلەنگەن ەرەجەلەرگە قايشى بولماۋى ءتيىس دەگەندەي. وسى ەنگىزىلگەن زاڭنان كەيىن، بەتىن جاۋىپ جۇرگەندەردى تەكسەرۋ مۇمكىندىگى پايدا بولدى دەپ ويلايمىن. بۇرىن زاڭنىڭ جوقتىعىنا بايلانىستى كوپ جاعدايدا تەكسەرە المايتىن. ەندى زاڭ بار. قوعامدىق ورتادى بەت-ءجۇزىن جاۋىپ جۇرگەندەردى تەكسەرۋگە بولادى. ەلىمىزگە كىمدەر كىرمەدى، ءالى دە كىرىپ جاتىر. سوعىستان قاشقانى بار، بوسقانى بار، قىلمىسكەرى بار، ميگرانتى بار، ايەلى بار، ەركەگى بار. كەيبىرى بەتتى جاۋىپ ءجۇردى عوي. سولاردى تەكسەرۋ دە كۇشەيەر. ونىڭ ۇستىنە قازىر كوپتەگەن مەكەمەدە Face ID تۇرادى. ول دا ادامدى تانۋ جانە قاۋىپسىزدىك ءۇشىن جاسالعان دۇنيە.
