ۇلىبريتانيا ازەربايجان مەن رەسەي اراسىنداعى شيەلەنىستىڭ كۇشەيۋى اياسىندا باكۋگە قولداۋ ءبىلدىردى. لوندوننىڭ بۇل ۇستانىمىن ۇلىبريتانيانىڭ ازەربايجانداعى ەلشىسى فەرگيۋس ولد جاريا ەتتى، دەپ حابارلايدى «ادىرنا» ءتىلشىسى.
ء«بىز قازا تاپقانداردىڭ وتباسىلارىنا كوڭىل ايتامىز جانە وسى قيىن ساتتە ازەربايجان حالقىمەن ىنتىماقتا ەكەنىمىزدى بىلدىرەمىز. سونداي-اق ازەربايجاننىڭ ادىلەتتىلىكتى قامتاماسىز ەتۋگە باعىتتالعان كۇش-جىگەرىن قولدايتىنىمىزدى مالىمدەيمىز»،— دەدى ديپلومات.
ايتا كەتەيىك، 27 ماۋسىم كۇنى تاڭەرتەڭ فسب قىزمەتكەرلەرى ەكاتەرينبۋرگتەگى بىرنەشە مەكەنجايعا رەيد ۇيىمداستىرىپ، ەتنيكالىق نەگىزدە قىلمىس جاسادى دەگەن كۇدىكپەن بىرنەشە ازاماتتى تۇتقىنداعان. ارنايى وپەراتسيا بارىسىندا زياددين جانە گۋسەين سافاروۆتار قازا تاۋىپ، تاعى بىرنەشە ادام جاراقات العان.
فسب بۇل رەيدتىڭ بىرنەشە جىل بويى ادام ءولتىرۋ مەن وزگە دە قىلمىستار جاسادى دەپ كۇدىككە ىلىنگەن ەتنيكالىق بانداعا قارسى باعىتتالعانىن حابارلادى. اتاپ ايتقاندا، 2001 جىلى ەكاتەرينبۋرگ تۇرعىنى يۋنيس پاشاەۆتى توپ بولىپ ءولتىرۋ ءىسى بويىنشا سافاروۆ باۋىرلارى بۇرىن دا كۇدىككە ىلىنگەنىمەن، ول كەزدە دالەل تابىلماعان.
بۇل وقيعاعا بايلانىستى باكۋ مەن ماسكەۋ اراسىندا ديپلوماتيالىق شيەلەنىس كۇشەيدى. بۇعان دەيىن ازەربايجاننىڭ ءوز اۋماعىندا رەسەيدىڭ مادەني شارالارىن وتكىزۋگە شەكتەۋ قويعانىن جازعان ەدىك.
