ماڭعىستاۋ وبلىسىندا وقۋ-جاتتىعۋ كەزىندە اسكەري قىزمەتشىلەردىڭ قازا تابۋى ەل ءۇشىن ۇلكەن قاسىرەت بولدى. بۇل تۋرالى ۆيتسە-پرەزيدەنت ەرلان قارين ايتتى، دەپ حابارلايدى "ادىرنا".
ونىڭ ايتۋىنشا، مەملەكەت باسشىسى قاسىم-جومارت توقاەۆ قايعىلى وقيعادان كەيىن زارداپ شەككەندەرگە كومەك كورسەتۋ جانە وقيعانىڭ بارلىق ءمان-جايىن جان-جاقتى ءارى وبەكتيۆتى تەرگەۋ ماسەلەلەرىن جەكە باقىلاۋىنا العان.
"پرەزيدەنتتىڭ جارلىعىمەن وقۋ-جاتتىعۋ كەزىندە قازا تاپقان 14 اسكەري قىزمەتشى «ايبىن» وردەنىمەن ماراپاتتالدى. سونداي-اق قاسىم-جومارت توقاەۆ جالپىۇلتتىق ازا تۇتۋ كۇنىن جاريالاپ، قازا بولعان ساربازداردىڭ وتباسىلارىنا كوڭىل ايتتى.
قايعىلى وقيعانىڭ سەبەپتەرى مەن ءمان-جايلارىن انىقتاۋ ءۇشىن ۇكىمەتتىك كوميسسيا قۇرىلىپ، وقيعا ورنىنا جىبەرىلدى. قۇقىق قورعاۋ ورگاندارى سوتقا دەيىنگى تەرگەپ-تەكسەرۋدى باستادى. قازىرگى ۋاقىتتا تەرگەۋ امالدارى جالعاسىپ جاتىر. ءىس باس پروكۋراتۋرا مەن ىشكى ىستەر مينيسترلىگىنىڭ ەرەكشە باقىلاۋىندا.
تەرگەۋ اياسىندا قورعانىس مينيسترلىگىنىڭ بىرقاتار لاۋازىمدى تۇلعاسى كۇدىكتى رەتىندە ۇستالعان", - دەدى ۆيتسە-پرەزيدەنت.
ەرلان قاريننىڭ سوزىنشە، مەملەكەت تاراپىنان قازا بولعان اسكەري قىزمەتشىلەردىڭ وتباسىلارى مەن زارداپ شەككەن جاۋىنگەرلەرگە قاجەتتى كومەك كورسەتىلۋدە. سونىمەن قاتار قوعام وكىلدەرى، كاسىپكەرلەر، مەتسەناتتار مەن ساياسي پارتيالاردىڭ وكىلدەرى دە وتباسىلارعا قولداۋ كورسەتۋگە دايىن ەكەنىن بىلدىرگەن.
"قايىرىمدىلىق قاراجاتىن جيناۋ مەن ءبولۋدىڭ اشىقتىعىن قامتاماسىز ەتۋ ءۇشىن ارنايى قور قۇرىلىپ، قوعامدىق كوميسسيا جاساقتالعان. كوميسسياعا جينالعان قاراجاتتىڭ ءادىل ءارى اشىق ءبولىنۋىن باقىلاۋ مىندەتى جۇكتەلگەن.
سونىمەن قاتار مەملەكەت باسشىسى قورعانىس مينيسترلىگىنىڭ جاڭا باسشىسىن تاعايىنداپ، ۆەدومستۆونىڭ جۇمىسىن كەشەندى تەكسەرۋ جونىندەگى كوميسسيا قۇردى. قارجى مەن اسكەري بولىمدەردىڭ ماتەريالدىق-تەحنيكالىق قامتاماسىز ەتىلۋىنە جۇرگىزىلگەن ءاۋديتتىڭ العاشقى قورىتىندىسى جەتى كۇن ىشىندە ۇسىنىلۋى ءتيىس.
بۇدان بولەك، پرەزيدەنت ون كۇن ىشىندە ارميانى رەفورمالاۋدىڭ ارنايى جوسپارىن ازىرلەۋدى تاپسىردى. رەفورمانىڭ نەگىزگى ماقساتى – اسكەري قىزمەتشىلەردىڭ قاۋىپسىزدىگى مەن ءومىرى باستى باسىمدىققا قويىلاتىن جاڭا ۇلگىدەگى ارميا قالىپتاستىرۋ", دەلىنگەن ەرلان قاريننىڭ جازباسىندا.
ونىڭ پىكىرىنشە، قابىلدانىپ جاتقان شارالار تەك قايعىلى وقيعانىڭ سالدارىن جويۋمەن شەكتەلمەي، ونىڭ تۇپكى سەبەپتەرىن انىقتاپ، مۇنداي جاعدايلاردىڭ قايتالانۋىنا جول بەرمەۋگە باعىتتالعان.
«ەڭ باستىسى – مەملەكەت تەك جەدەل ارەكەت ەتىپ قانا قويماي، وقيعالاردىڭ تۇپكى سەبەپتەرىن جويۋعا باعىتتالعان جۇيەلى ءارى كەشەندى شەشىمدەر قابىلداۋدا»، – دەدى ول.
