بۇگىن، 30 ماۋسىم كۇنى استانادا بوكستان الەم كۋبوگى باستالدى. جاھاندىق جارىسقا 30-عا جۋىق ەلدەن 300-دەن استام سپورتشى كەلدى. الايدا الەم كۋبوگىنىڭ العاشقى كۇنىندە-اق ۇيىمداستىرۋ جۇمىستارىنا قاتىستى بىرقاتار ماسەلە تۋىنداعان. بۇل تۋرالى جۋرناليست اسەم ابىلبەك ايتتى، دەپ حابارلايدى «ادىرنا» ءتىلشىسى.
ول الەمدىك دودادا جۋرناليستەردىڭ جۇمىس ىستەۋ مۇمكىندىگىنىڭ شەكتەۋلى بولعانىن اتاپ ءوتتى.
«جۋرناليست بولعان سوڭ مىندەتىمىز —اقپارات جەتكىزۋ. جاڭالىق جازىپ، ۆيدەو ءتۇسىرىپ، اتموسفەرانى كورسەتۋ. سول ءۇشىن باردىق. بىراق تۇسىرەتىن ورنىمىز شارشى الاڭنان تىم الىس بولىپ شىقتى. ءار ەسىكتەن سىعالاپ، ءبىر بۇرىشتان ەكىنشىسىنە وتكەنىمىز بولەك اڭگىمە. ميكست-زونادا ەسىكتى جاۋاپ قويعانى تاعى بار. ۇيىمداستىرۋشىلاردىڭ ايتۋىنشا، World Boxing ۇيىمىنىڭ ەرەجەسىنە سايكەس، رينگ جانىندا 4-اق ادام عانا تۇرۋى كەرەك ەكەن. اشىلۋ سالتاناتى كەزىندە سول ايماققا قالىپ قويعان كەيبىر جۋرناليستەردى ەشكىم قوزعامادى. ال سۇحبات الۋ ءۇشىن سىرتقا شىعىپ، قايتا كىرگىمىز كەلگەندە زالعا كىرە الماي، سىرتتا قالىپ قويدىق. ءوز ەلىمىزدە ءوتىپ جاتقان جارىسقا ءوزىمىز كىرە الماۋ وكىنىشتى. جۋرناليستەر بۇل جارىسقا ەرمەك ءۇشىن كەلگەن جوق. اقپارات تاراتىپ، حالىقارالىق دودا جايلى ساپالى كونتەنت جاساۋ ءۇشىن كەلدى. بۇل ەل ءيميدجى ءۇشىن دە ماڭىزدى دۇنيە ەدى»،—دەدى باق وكىلى.
جۋرناليستەردەن بولەك، جارىستى تاماشالاۋعا كەلگەن جانكۇيەرلەر دە ىشكە كىرە الماعان.
«رينگكە جاقىن ايماقتاردا بوس ورىن جەتەرلىك ەدى. بىراق ول جەرلەر تەك دەپۋتاتتار مەن شەنەۋنىكتەرگە ارنالعان كورىنەدى. ارينە، ولاردىڭ دا ورنى بولۋى زاڭدى. بىراق سپورت دوداسىنىڭ باستى جاناشىرى حالىق ەكەنىن ۇمىتپاعان ءجون.
ءبىرىنشى كۇننەن وسىنداي ۇيىمداستىرۋ كەمشىلىكتەرى كوڭىلگە كىربىڭ ءتۇسىردى. سپورتتى قولدايىق دەيمىز. بىراق سپورت تريبۋنادان باستالادى. ءجۋرناليستىڭ جۇمىسىنا، جانكۇيەردىڭ ىقىلاسىنا شەكتەۋ قويىلعان جەردە شىنايى قولداۋ بولمايدى. مۇنداي حالىقارالىق جارىستار الداعى ۋاقىتتا تاعى وتەدى. بىراق بۇگىنگى كەتكەن ولقىلىقتاردى ەسكەرىلسە ەكەن»،—دەپ تولىقتىردى اسەم ابىلبەك.
