بۇگىن ازەربايجاندا 2020 جىلى بولعان 44 كۇندىك وتان سوعىسىنداعى جەڭىستىڭ التىنشى جىلدىعىنا وراي مەرەكەلىك ءىس-شارالار وتۋدە. جەڭىس كۇنى 2020 جىلعى 3 جەلتوقساندا ازەربايجان پرەزيدەنتى، قارۋلى كۇشتەردىڭ جوعارعى باس قولباسشىسى يلحام اليەۆتىڭ جارلىعىمەن بەلگىلەنگەن. بۇل تۋرالى Report اگەنتتىگى جازلى، دەپ حابارلايدى “ادىرنا”.
ەسكە سالايىق، 2020 جىلعى 27 قىركۇيەكتە ارمەنيا مەن ازەربايجان اراسىنداعى قاقتىعىس قايتا ءورشىپ، ازەربايجان ارمياسى قارسى شابۋىلعا شىققان بولاتىن. باكۋ اسكەري وپەراتسيانىڭ ماقساتى رەتىندە وككۋپاتسياداعى اۋماقتاردى ازات ەتۋدى، بۇۇ قاۋىپسىزدىك كەڭەسىنىڭ قارارلارىن ورىنداۋدى، ءماجبۇرلى قونىس اۋدارعان ازاماتتاردىڭ تۋعان جەرىنە ورالۋىن قامتاماسىز ەتۋدى جانە تاريحي ادىلەتتىلىكتى قالپىنا كەلتىرۋدى اتادى.
44 كۇنگە سوزىلعان اسكەري قيمىلدار بارىسىندا ازەربايجان ارمياسى 5 قالا، 4 كەنت جانە 286 اۋىلدى باقىلاۋىنا قايتاردى.
اتاپ ايتقاندا، جەبىرەيىل، فيزۋلي، زاڭگىلان، قۇبادلى جانە شۋشا قالالارى ازات ەتىلدى. سونداي-اق بىرقاتار اۋدانداعى ەلدى مەكەندەر مەن ستراتەگيالىق ماڭىزى بار بيىكتىكتەر باقىلاۋعا الىندى.
سوعىستىڭ شەشۋشى كەزەڭى شۋشا قالاسىنىڭ ازات ەتىلۋىمەن بايلانىستى بولدى. ودان كەيىن تاراپتار اسكەري ءىس-قيمىلداردى توقتاتۋ جونىندەگى كەلىسىمگە كەلدى. ناتيجەسىندە كەلبادجار، اگدام جانە لاچىن اۋداندارى ازەربايجانعا قايتارىلدى.
2020 جىلعى 9 قاراشادان 10 قاراشاعا قاراعان ءتۇنى ازەربايجان پرەزيدەنتى يلحام اليەۆ، ارمەنيا پرەمەر-ءمينيسترى نيكول پاشينيان جانە رەسەي پرەزيدەنتى ۆلاديمير پۋتين اتىستى تولىق توقتاتۋ تۋرالى ۇشجاقتى مالىمدەمەگە قول قويدى.
قۇجات بويىنشا، تاراپتار اسكەري ءىس-قيمىلداردى توقتاتۋعا كەلىستى. وسىلايشا، 44 كۇندىك سوعىس اياقتالىپ، ايماقتاعى قاقتىعىستى رەتتەۋدىڭ جاڭا كەزەڭى باستالدى.
