اقش پرەزيدەنتى دونالد ترامپ يزرايل مەن يران اراسىنداعى قارۋلى قاقتىعىسقا بايلانىستى بەيبىت كەلىسىمگە قول جەتكىزىلگەنىن حابارلادى. بۇل تۋرالى ول 24 ماۋسىم كۇنى Truth Social الەۋمەتتىك جەلىسىندەگى پاراقشاسىندا جازدى، دەپ حابارلايدى “ادىرنا”.
ونىڭ ايتۋىنشا، الداعى بىرنەشە ساعات ىشىندە تاراپتار تولىق جانە تۇبەگەيلى اتىستى توقتاتۋ رەجيمىن ورناتادى.
«يزرايل مەن يران تولىق جانە تۇبەگەيلى اتىستى توقتاتۋ تۋرالى كەلىستى. قازىرگى ساتتەن باستاپ شامامەن 6 ساعات ىشىندە تاراپتار وزدەرىنىڭ سوڭعى اسكەري ميسسيالارىن اياقتايدى. وسىدان كەيىن 12 ساعات ىشىندە سوعىس اياقتالعان دەپ جاريالانادى»، — دەدى ترامپ مالىمدەمەسىندە.
ونىڭ سوزىنە سەنسەك، يران اتىستى توقتاتۋدى ءبىرىنشى بولىپ باستايدى. ال 12 ساعات وتكەن سوڭ يزرايل دە سوعىس ارەكەتتەرىن دوعارادى. 24 ساعات ىشىندە بۇكىل الەم 12 كۇنگە سوزىلعان سوعىستىڭ رەسمي اياقتالعانىن جاريالاپ قارسى الماق.
«بۇل سوعىس جىلدارعا سوزىلىپ، بۇكىل تاياۋ شىعىستى جويىپ جىبەرۋى مۇمكىن ەدى. بىراق ول بولمادى، ەندى ەشقاشان بولمايدى دا! قۇداي ءيزرايلدى جارىلقاسىن، قۇداي يراندى جارىلقاسىن، قۇداي تاياۋ شىعىستى جارىلقاسىن، قۇداي امەريكا قۇراما شتاتتارىن جارىلقاسىن، قۇداي بۇكىل الەمدى جارىلقاسىن!» - دەپ اياقتادى اقش پرەزيدەنتى ءوزىنىڭ سوزىندە.
الايدا، ترامپتىڭ بۇل مالىمدەمەسىنە بايلانىستى يران دا، يزرايل دە رەسمي تۇسىنىكتەمە بەرگەن جوق. تاراپتار اتىستى توقتاتۋ تۋرالى قانداي دا ءبىر كەلىسىمگە كەلىسكەن-كەلىسپەگەنى ازىرگە بەلگىسىز.
ەسكە سالساق، يزرايل مەن يران اراسىنداعى قاقتىعىس سوڭعى اپتادا ۋشىعىپ، ايماقتاعى جاعدايدى كۇردەلەندىرىپ جىبەرگەن بولاتىن. 12 كۇنگە سوزىلعان بۇل اسكەري قاقتىعىستا جۇزدەگەن ادام قازا تاۋىپ، مىڭداعان ادام جارالاندى.
