وزبەكستان پرەزيدەنتى شاۆكات ميرزيوەۆ موڭعوليا پرەزيدەنتى ۋحنااگين حۋرەلسۋحتىڭ شاقىرۋىمەن ۇلانباتىر قالاسىنا مەملەكەتتىك ساپارمەن باردى. بۇل ساپار اياسىندا ەكى ەل اراسىندا 14 رەسمي قۇجاتقا قول قويىلدى، دەپ زابارلايدى “ادىرنا”.
قۇجاتتار ەكىجاقتى ىنتىماقتاستىقتى جان-جاقتى دامىتۋعا باعىتتالعان.
ساپار قورىتىندىسىندا ەكى ەلدىڭ باسشىلارى جان-جاقتى ارىپتەستىك ورناتۋ تۋرالى بىرلەسكەن دەكلاراتسياعا قول قويدى. تاراپتار موڭعوليا مەن وزبەكستان اراسىنداعى ءداستۇرلى دوستىق پەن ىنتىماقتاستىقتى تەرەڭدەتۋ تەك ەكىجاقتى عانا ەمەس، بۇكىل ورتالىق ازيا ايماعىنىڭ تۇراقتىلىعى مەن دامۋىنا وڭ اسەر ەتەتىنىن اتاپ ءوتتى.
قول قويىلعان نەگىزگى قۇجاتتار مىنالار:
- ەكونوميكالىق ىنتىماقتاستىق باعدارلاماسى: ساۋدا، ينۆەستيتسيا جانە كاسىپكەرلىكتى دامىتۋ سالاسىنداعى سەرىكتەستىك;
- سىرتقى ىستەر مينيسترلىكتەرى اراسىنداعى 2026–2027 جىلدارعا ارنالعان ىنتىماقتاستىق باعدارلاماسى;
- قىلمىسپەن كۇرەس جانە ونىڭ الدىن الۋ سالاسىنداعى حاتتاما;
- مۇراعات ءىسى سالاسىنداعى ىنتىماقتاستىق پروتوكولى;
- جوعارى ءبىلىم جانە عىلىم سالاسىنداعى كەلىسىم;
- مينەرالدىق رەسۋرستار مەن تاۋ-كەن ونەركاسىبى بويىنشا مەموراندۋم;
- وسىمدىكتەر كارانتينى مەن قورعاۋ سالاسىنداعى كەلىسىم;
- اۋىل شارۋاشىلىعىندا بىرلەسكەن جوبالاردى ىسكە اسىرۋ جوسپارى;
- دەنساۋلىق ساقتاۋ سالاسىنداعى ىنتىماقتاستىق تۋرالى پروتوكول;
- قورشاعان ورتانى قورعاۋ جانە كليماتتىڭ وزگەرۋى بويىنشا بىرلەسكەن قۇجات;
- سپورت جانە دەنە شىنىقتىرۋ سالاسىنداعى كەلىسىم;
- ەكوتۋريزم سالاسىنداعى ءىس-قيمىل جوسپارى مەن ىنتىماقتاستىق باعدارلاماسى (2025–2028 جج.);
- مادەنيەت سالاسىنداعى ءوزارا الماسۋ جانە مۇرالاردى ساقتاۋ باعىتىنداعى كەلىسىمدەر.
اتالعان كەلىسىمدەر ارقىلى تاراپتار ءتۇرلى سالاداعى بايلانىستى نىعايتىپ، بىرلەسكەن جوبالاردى جۇزەگە اسىرۋعا نيەتتى ەكەندەرىن كورسەتتى. بۇل تاريحي ساپار موڭعوليا مەن وزبەكستان اراسىنداعى قاتىناستاردى جاڭا دەڭگەيگە كوتەرەدى دەپ كۇتىلۋدە.
