قازاقستان پرەزيدەنتى قاسىم-جومارت توقاەۆتىڭ قىرعىز رەسپۋبليكاسىنا رەسمي ساپارى اياقتالدى، دەپ حابارلايدى “ادىرنا”.
اقوردانىڭ حابارلاۋىنشا، حالىقارالىق ماناس اۋەجايىنان مەملەكەت باسشىسى قاسىم-جومارت توقاەۆتى قىرعىزستان پرەزيدەنتى سادىر جاپاروۆ قۇرمەتپەن شىعارىپ سالدى.
قاسىم-جومارت توقاەۆ رەسمي ساپارمەن قىرعىزستانعا 2025 جىلى 21 تامىزدا باردى. مەملەكەت باسشىسىن اۋەجايدان سادىر جاپاروۆتىڭ ءوزى قارسى الدى.
22 تامىزدا قاسىم-جومارت توقاەۆ پەن سادىر جاپاروۆ قازاقستان مەن قىرعىزستان جوعارى مەملەكەتارالىق كەڭەسىنىڭ وتىرىسىنا قاتىستى.
مەملەكەت باسشىسى قىرعىزستان پرەزيدەنتىنىڭ ەكىجاقتى ىقپالداستىقتى جاڭا دەڭگەيگە كوتەرۋگە زور ۇلەس قوسقانىنا نازار اۋداردى.
– مەن مۇنى جوعارى باعالايمىن. قاجىرلى ەڭبەگىڭىزدىڭ ارقاسىندا قىرعىزستاندا كوپتەگەن وڭ وزگەرىس بولىپ جاتىر. ءسىز حالىقتىڭ ءال-اۋقاتىن جاقسارتۋدى كوزدەيتىن ماڭىزدى باستامالاردى جۇزەگە اسىرىپ كەلەسىز. ەل ەكونوميكاسىنىڭ جىل باسىنان بەرى 11,7 پايىزعا ءوسۋى – وسىنىڭ ايقىن دالەلى. ءبىز باۋىرلاس ەلدىڭ بارلىق جەتىستىكتەرىنە قۋانامىز. قىرعىزستانمەن اراداعى ىنتىماقتاستىقتى بارىنشا نىعايتۋعا ايرىقشا ءمان بەرەمىز، – دەدى مەملەكەت باسشىسى.
سادىر جاپاروۆ شاقىرۋىن قابىل الىپ، قىرعىزستانعا رەسمي ساپارمەن كەلگەنى ءۇشىن قازاقستان پرەزيدەنتىنە ريزاشىلىعىن جەتكىزدى.
– ءسىزدى قىرعىزستاندا كورنەكتى مەملەكەت قايراتكەرى جانە حالىقارالىق دەڭگەيدەگى تاجىريبەلى ديپلومات رەتىندە بىلەدى. سوڭعى جىلدارى ءسىزدىڭ قولداۋىڭىزبەن ەكى ەلدىڭ قارىم-قاتىناسى جاڭا دەڭگەيگە ءوتىپ، دوستىعىمىز بەن باۋىرلاستىعىمىزدىڭ بەكەمدەلە ءتۇسۋى ءبىزدى قۋانتادى. قازاق ەلى – ءبىز ءۇشىن ەرەكشە ەل. ءبىزدىڭ مامىلەلەرىمىز توقتوعۇل مەن ابايداي، شىڭعىس پەن مۇحتارداي اتالارىمىز سالعان ىزبەنەن جالعاسقان. تاريحي مۇرامىزدى ۇمىتپاي، كەلەشەك بۋىنعا جەتكىزۋدى نەگىزگى ماقساتىمىز دەپ ەسەپتەيمىن. ءوز تاراپىمنان ءوزارا قارىم-قاتىناسىمىزدى ودان ءارى ىلگەرىلەتۋگە دايىنمىن. ءبىزدىڭ نەگىزگى كۇشىمىز – ەكى ەلدىڭ ىنتىماعى مەن بىرلىگى، – دەدى قىرعىزستان پرەزيدەنتى.
بۇدان بولەك، كەلىسسوز بارىسىندا تاراپتار ساياسي، كولىك-ترانزيت، سۋ، اگرارلىق جانە تسيفرلاندىرۋ سالالارىنداعى ىقپالداستىقتى نىعايتۋ ماسەلەلەرىن تالقىلادى. مادەني-گۋمانيتارلىق بايلانىستاردى ورىستەتۋگە ەرەكشە ءمان بەرىلدى. سونىمەن قاتار وڭىرلىك جانە حالىقارالىق كۇن ءتارتىبى قاراستىرىلدى.
كەيىننەن قازاقستان مەن قىرعىزستان مەملەكەتتەرى باسشىلارىنىڭ بىرلەسكەن مالىمدەمەسى قابىلداندى.
پرەزيدەنت سادىر جاپاروۆتى "التىن قىران" وردەنىمەن ماراپاتتادى.
سونىمەن قاتار قاسىم-جومارت توقاەۆ پەن سادىر جاپاروۆ ءباسپاسوز بريفينگىن وتكىزدى.
بۇدان بولەك قاسىم-جومارت توقاەۆ قىرعىزستاننىڭ بىرقاتار مەملەكەت جانە قوعام قايراتكەرىن ماراپاتتادى.
سونداي-اق توقاەۆ پەن جاپاروۆ "دوستىقتىڭ التىن كوپىرى" ەسكەرتكىشىنىڭ اشىلۋ راسىمىنە قاتىستى.
ودان بولەك، مەملەكەت باسشىسى كەمەل توقاەۆ اتىنداعى №33 مەكتەپ-گيمنازياسىنا باردى.
