«پروتوكولدان تىس. قازاقستانداعى اتىشۋلى قىلمىستار قۇپياسى» كىتابىنىڭ اۆتورى اسقار جالدينوۆ «5:32» سەريالىن تۇسىرگەندەردى سوتقا بەردى، دەپ حابارلايدى "ادىرنا" ۇلتتىق پورتالى قازاقپاراتقا سىلتەمە جاساپ.
ا.جالدينوۆتىڭ ايتۋىنشا، «5:32» سەريالىنا ارقاۋ بولعان حيكايالار ونىڭ كىتابىنان رۇقساتسىز الىنعان. سوتقا دەيىنگى شاعىمدار Salem Social Media جشس-عا، رەجيسسەر الىشەر ۋتەۆكە جانە وسى سەريالدا جۇمىس ىستەگەن ەكى ستسەناريستكە جىبەرىلگەن.
اۆتور سەريالدىڭ پرەمەراسى 2021 جىلى وتكەنىن، ال كىتاپ 2020 جىلى جارىق كورگەنىن اتاپ ءوتتى.
«وتكەن جىلى سوتقا بەرگەن جوقپىن، ويتكەنى بالەقور اتانىپ، داۋ-دامايدىڭ ورتاسىندا جۇرگىم كەلمەدى. بىراق، بيىل Salem Social Media كومپانياسى مەن ولاردىڭ قۇرىلتايشىسى، ەۋرازيا ونەركاسىپتىك توبى – ERG تاراپىنان جاسالعان ءىس-ارەكەتتەر مەنى وسى شەشىمدى قابىلداۋعا يتەرمەلەدى جانە «سپورتتىق قىزىعۋشىلىعىمدى» تۋدىردى. ەندى مەن ءوز اقيقاتىمدى سوتتا دالەلدەگىم كەلەدى جانە سەريال تۇسىرگەندەردىڭ وسىنداي ورەسكەل ارەكەتى ءۇشىن جازالانعانىن قالايمىن. سوت تالابى دا جاقىندا بولادى»، — دەدى ول ءوزىنىڭ Instagram-داعى پاراقشاسىندا.
ايتا كەتەيىك، «5:32» سەريالىندا قاتىگەز ادام ءولتىرۋ قىلمىسىن اشىپ، مانياكتاردى ۇستاعان قازاقستاندىق پوليتسەيلەر تۋرالى باياندالادى. سەريال 1990 جىلدارى بولعان شىنايى وقيعالارعا نەگىزدەلگەن. باستى رولدەردە ءابىلمانسۇر سەرىكوۆ پەن مارات امىراەۆ وينايدى.
"ادىرنا" ۇلتتىق پورتالى
