«Protokoldan tys. Qazaqstandaǧy atyşuly qylmystar qūpiiasy» kıtabynyŋ avtory Asqar Jaldinov «5:32» serialyn tüsırgenderdı sotqa berdı, dep habarlaidy "Adyrna" ūlttyq portaly QazAqparatqa sılteme jasap.
A.Jaldinovtyŋ aituynşa, «5:32» serialyna arqau bolǧan hikaialar onyŋ kıtabynan rūqsatsyz alynǧan. Sotqa deiıngı şaǧymdar Salem Social Media JŞS-ǧa, rejisser Älışer Utevke jäne osy serialda jūmys ıstegen ekı ssenaristke jıberılgen.
Avtor serialdyŋ premerasy 2021 jyly ötkenın, al kıtap 2020 jyly jaryq körgenın atap öttı.
«Ötken jyly sotqa bergen joqpyn, öitkenı bäleqor atanyp, dau-damaidyŋ ortasynda jürgım kelmedı. Bıraq, biyl Salem Social Media kompaniiasy men olardyŋ qūryltaişysy, Euraziia önerkäsıptık toby – ERG tarapynan jasalǧan ıs-äreketter menı osy şeşımdı qabyldauǧa itermeledı jäne «sporttyq qyzyǧuşylyǧymdy» tudyrdy. Endı men öz aqiqatymdy sotta däleldegım keledı jäne serial tüsırgenderdıŋ osyndai öreskel äreketı üşın jazalanǧanyn qalaimyn. Sot talaby da jaqynda bolady», — dedı ol özınıŋ Instagram-daǧy paraqşasynda.Aita keteiık, «5:32» serialynda qatygez adam öltıru qylmysyn aşyp, maniaktardy ūstaǧan qazaqstandyq poliseiler turaly baiandalady. Serial 1990 jyldary bolǧan şynaiy oqiǧalarǧa negızdelgen. Basty rölderde Äbılmansūr Serıkov pen Marat Ämıraev oinaidy.
"Adyrna" ūlttyq portaly
