«Ақжайық» мемлекеттік табиғи резерваты аумағындағы өрт салдарын жою жөніндегі жедел штабтың көшпелі отырысы өтті.
Қазіргі уақытта шымтезек қабаттарының жанып жатқан ошақтарын сөндіру жұмыстары жалғасып жатыр.
Жедел мәліметтерге сәйкес, қазіргі кезде ашық жалын ошақтары тіркелмеген – өрт оқшауланған. Негізгі күш шымтезек пен қамыстың тлеуін толық сөндіруге бағытталған. Жұмыстар тәулік бойы жүргізілуде. Қайта жанудың алдын алу мақсатында өртенген аумақтар су құйылып, топырақпен жабылуда.
Өрттің салдарын жоюға шамамен 150 адам, 40 техника бірлігі және 2 тікұшақ жұмылдырылған. Отырыста Төтенше жағдайлар департаментінің бастығы Нұрлан Жанабаев пен облыс әкімінің орынбасары Қайрат Нұртаев қазіргі жағдай мен қабылданып жатқан шаралар бойынша баяндама жасады.
Облыс әкімі барлық жану ошақтары толығымен жойылғанша жұмысты бәсеңдетпеуді, жағдайды тұрақты бақылауда ұстауды және барлық қызметтердің толық үйлесімді жұмысын қамтамасыз етуді тапсырды.
Өрт ошағын бақылау мен оқшаулау тиімділігін арттыру мақсатында жылу түсіргішпен жабдықталған дрон қолданылуда. Инфрақызыл түсірілім аумақтың жоғары температуралы бөліктерін, соның ішінде шымтезектің терең қабаттарындағы тлеу ошақтарын анықтауға мүмкіндік береді. Бұл әсіресе қол жетуі қиын аймақтарда өте маңызды.
Жылу түсіргішті дрон қолдану мүмкіндігі:
- жасырын жану ошақтарын жедел анықтау;
- жоғары температуралы аймақтарды дәл белгілеу;
- күш пен техниканы басым бағыттарға жіберу;
- өрттің қайта тұтануын алдын ала ескерту.
Отырыста облыс әкімі өрттің шығу себептеріне қатысты пікір білдірді:
«Әлеуметтік желілерде «Ақжайық» резерваты аумағындағы өртке қатысты түрлі нұсқалар тарап жатыр. Осыған байланысты менің тапсырмаммен барлық жағдайлар мен болжамдар тиісті органдар тарапынан мұқият тексерілуде. Егер өрт адамның — әсіресе қасақана әрекетінің салдарынан шыққаны дәлелденсе, кінәлілер заңға сәйкес жауапкершілікке тартылады», — деді өңір басшысы.
Тексеру барысы туралы жұртшылық пен бұқаралық ақпарат құралдарына қосымша ақпарат берілетіні айтылды.
Серік Шәпкенов «Ақжайықтағы» өрт – бақылау тарихындағы ең ұзаққа созылғандардың бірі болғанын және бұл бірқатар жүйелі мәселелерді айқын көрсеткенін атап өтті.
«Каспийдің тартылуы мен аумақтың қатты қамыстануы — бұл мәселенің болашақта өңір үшін үлкен сын болатынын көрсетеді. Біз бұл мәселеге жүйелі түрде қарауымыз қажет. Өртті сөндіру жұмыстары аяқталғаннан кейін, Экология министрлігі және Төтенше жағдайлар министрлігімен бірлесе отырып, мұндай жағдайлардың алдын алу бойынша кешенді жоспар әзірленіп, қабылданады», — деді әкім.
Облыс әкімі өртті сөндіруге қатысқан барлық мамандарға алғысын білдірді:
«Құрметті жерлестер, уақытпен санаспай, осы күрделі әрі маңызды жұмысты атқарып жатқан барлық қызметкерлерге шын жүректен алғысымды білдіремін. Бұл – кәсібилік пен табандылықты талап ететін нағыз командалық жұмыс».
«Сондай-ақ осы қиын кезеңде сабырлық, қолдау және түсіністік танытқан облыс тұрғындарына ерекше алғысымды білдіремін», — деп түйіндеді Серік Шәпкенов.
