2022 جىلدىڭ 9 قاراشاسىندا قر پرەزيدەنتتىگىنە جالپىۇلتتىق سوتسيال-دەموكراتيالىق پارتياسى اتىنان كانديدات نۇرلان اۋەسباەۆ استانا قالاسىندا سايلاۋشىلارمەن كەزدەسۋ وتكىزدى.
كەزدەسۋ بارىسىندا كانديدات جينالعان قاۋىمعا سايلاۋالدى باعدارلاماسىنىڭ باسىم باعىتتارى جونىندە بايانداپ بەردى.
نۇرلان اۋەسباەۆتىڭ پىكىرىنشە، مەملەكەت الدىندا تۇرعان باستى ماسەلەلەردىڭ ءبىرى – سىبايلاس جەمقورلىقتىڭ دەڭگەيىن تومەندەتۋ. ول ءۇشىن بىرقاتار ساياسي رەفورمالاردى جۇزەگە اسىرۋ كەرەك.
رەفورمالاردىڭ ءبىرى بيۋدجەت پروتسەدۋرالارىن جەتىلدىرۋمەن ايقىندالادى. ءار ەلدى-مەكەندە وزىنە تيەسىلى اشىق بيۋدجەت جاساقتالىپ، ناقتى ۋاقىت رەجيمىندە ونلاين تۇردە مەملەكەت اقشاسىنىڭ قالاي جانە قايدا جۇمسالىپ جاتقاندىعى اشىق كورسەتىلىپ وتىرۋى كەرەك.
سونداي-اق، ورتالىق جانە جەرگىلىكتى اتقارۋ ورگاندارىندا بارلىق دەڭگەيدەگى دەپۋتاتتار مەن شەنەۋنىكتەردىڭ كىرىس-شىعىسى تۋرالى مىندەتتى جاريا دەكلاراتسيانى شۇعىل تۇردە ەنگىزۋ قاجەت.
سونىمەن بىرگە نۇرلان اۋەسباەۆ زاڭسىز بايۋعا قاتىستى قىلمىستىق جاۋاپكەرشىلىكتى قاتاڭداتۋدى ۇسىندى. ونىڭ پىكىرىنشە، پاراقورلارمەن ناتيجەلى كۇرەستىڭ جالعىز جولى وسى.
