استانا قالاسىنىڭ اكىمى جەڭىس قاسىمبەك قازاقستان رەسپۋبليكاسى ۇستەل تەننيسى فەدەراتسياسىنىڭ پرەزيدەنتى بولىپ سايلاندى، دەپ حابارلايدى "ادىرنا" ۇلتتىق پورتالى.
ءتيىستى شەشىم ۇيىمنىڭ كەزەكتەن تىس كونفەرەنتسياسىندا قابىلداندى.
فەدەراتسيانىڭ ءباسپاسوز قىزمەتىنىڭ مالىمەتىنشە، اكىم ۇيىم جەتەكشىلىگىن 2018 جىلدان بەرى ۇيىمدى باسقارىپ كەلگەن دانيار ابىلعازيننەن كەيىن قابىلداپ وتىر.
سايلاۋ قازاقستاندا ۇستەل تەننيسىن دامىتۋ جانە 2027 جىلى استانادا وتەتىن ITTF World Table Tennis Championships Finals الەم چەمپيوناتىنا دايىندىق كەزەڭىندە ءوتتى. فەدەراتسيانىڭ حابارلاۋىنشا، جاڭا باسشىلىق تۇسىندا ەلىمىزدە ۇستەل تەننيسىن جۇيەلى دامىتۋ، سپورتشىلاردىڭ ساپالى دايىندىعىنا جاعداي جاساۋ جانە قازاقستاننىڭ حالىقارالىق سپورت ارەناسىنداعى پوزيتسياسىن نىعايتۋ باعىتىنداعى جۇمىستار جالعاسادى.
ايتا كەتەيىك، جەڭىس قاسىمبەك بۇعان دەيىن قاراعاندى وبلىستىق ۇستەل تەننيسى فەدەراتسياسىن باسقارعان. كەيىن استاناداعى قالالىق فيليالدىڭ جۇمىسىنا جەتەكشىلىك ەتكەن.
