ۇلىبريتانيا پارلامەنتى مەن لوردتار پالاتاسىنىڭ توعىز پارتيادان شىققان 80-نەن استام مۇشەسى ەلدىڭ جاڭا پرەمەر-مينيسترىنە اشىق حات جولداپ، يزرايلگە قاتىستى قاتاڭ سانكتسيالار ەنگىزۋدى تالاپ ەتتى, دەپ حابارلايدى "ادىرنا".
حات اۆتورلارى يزرايلگە قارۋ-جاراق جەتكىزۋگە تولىق ەمبارگو جاريالاۋدى، سونداي-اق ءيزرايلدىڭ قونىستاندىرۋ ساياساتىن قولدايتىن ساۋدا تۇرلەرىنە تىيىم سالۋدى ۇسىنعان. قۇجاتتىڭ باستاماشىسى – دەپۋتات كيم دجونسون.
زاڭ شىعارۋشىلاردىڭ پىكىرىنشە، ۇلىبريتانيا ۇكىمەتى پالەستينا حالقىنىڭ قۇقىقتارىن قورعاۋ جانە حالىقارالىق قۇقىقتىڭ ساقتالۋىن قامتاماسىز ەتۋ ماقساتىندا قازىرگى ۇستانىمىن قايتا قاراۋى قاجەت. ولار بۇعان دەيىنگى ۇكىمەتتىڭ حالىقارالىق سوتتاردىڭ شەشىمدەرىن ەلەمەگەنىن دە سىنعا الدى.
حاتتا 2024 جىلعى شىلدەدە بۇۇ حالىقارالىق سوتى شىعارعان شەشىمگە نازار اۋدارىلعان. اتالعان شەشىمدە مەملەكەتتەردەن يزرايل تاراپىنان حالىقارالىق قۇقىقتىڭ ورەسكەل بۇزىلۋىنا ىقپال ەتۋى مۇمكىن كەز كەلگەن ارەكەتتەردى توقتاتۋ تالاپ ەتىلگەنى ايتىلعان.
سونداي-اق حات اۆتورلارى جاڭا پرەمەر-مينيستر ەندي بيورنەمدى بۇرىنعى پرەمەر كير ستارمەردىڭ يزرايلگە قاتىستى ساياساتىن قايتا قاراپ، جاڭا باعىت ۇستانۋعا شاقىرعان.
