16 ماۋسىمدا ينتەرنەت كەڭىستىگىندە قازاقستان ازاماتتارىنىڭ جەكە مالىمەتتەرى – 16,3 ميلليون جازبا اشىق قولجەتىمدىلىككە تارادى دەگەن اقپارات پايدا بولدى. بۇل مالىمەتتى كيبەرشابۋىلداردى تالداۋ جانە زەرتتەۋ ورتالىعىنىڭ (تساركا) باسشىسى ولجاس ساتيەۆ راستادى، دەپ حابارلايدى "ادىرنا" ۇلتتىق پورتالى.
تاراعان دەرەكتەردىڭ ىشىندە ازاماتتاردىڭ اتى-ءجونى، تۋعان كۇنى، جىنىسى، جسن، تىركەۋدەگى مەكەنجايى، تۇرۋدىڭ باستالۋ كۇنى، ۇيالى جانە ءۇي تەلەفون نومىرلەرى، ازاماتتىعى مەن ۇلتى سياقتى ماڭىزدى جەكە مالىمەتتەر بار.
وسىعان بايلانىستى تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى رەسمي مالىمدەمە جاسادى. ۆەدومستۆو مالىمەتىنشە، قازىرگى ۋاقىتتا ينتەرنەتتە تارالعان اقپاراتقا بايلانىستى بارلىق ۋاكىلەتتى ورگاندار مەن تەحنيكالىق قىزمەتتەر جۇمىلدىرىلىپ، كەشەندى تەكسەرۋ جۇرگىزىلىپ جاتىر.
«العاشقى تالداۋ ناتيجەسى بويىنشا، كوپشىلىك دەرەكتەر ەسكى بولۋى مۇمكىن. سوندىقتان تەكسەرۋ اياقتالماي تۇرىپ، بۇل اقپاراتتىڭ ناقتى ءارى شىنايى ەكەنىن راستاۋ نەمەسە جوققا شىعارۋ ەرتە»، – دەلىنگەن مينيسترلىك حابارلاماسىندا.
مينيسترلىك الداعى ۋاقىتتا قوسىمشا اقپارات تەكسەرۋ تولىق اياقتالعاننان كەيىن بەرىلەتىنىن ايتتى. سونىمەن قاتار، ازاماتتارعا eGov پورتالى ارقىلى جەكە حابارلاما جولدانادى دەپ جوسپارلانىپ وتىر.
