قازاقستان حالقى اسسامبلەياسىنىڭ 30 جىلدىعى جانە جۇمىسشى ماماندىقتارى جىلى اياسىندا «ادال ازامات – ۇلت كەلبەتى» تاقىرىبىندا قازاقستان حالقى اسسامبلەياسى اقساقالدار كەڭەسىنىڭ V رەسپۋبليكالىق فورۋمى ءوتتى، دەپ حابارلايدى "ادىرنا" ۇلتتىق پورتالى.
17 ماۋسىمدا قاتىسۋشىلار الماتى ەلەكترومەحانيكالىق كوللەدجىنە بارىپ، جۇمىسشى ماماندىقتارىنىڭ دامۋ بارىسىمەن جانە جاستاردى كاسىپتىك باعدارلاۋ ۇدەرىستەرىمەن تانىستى.
نەگىزگى پلەنارلىق وتىرىس 18 ماۋسىمدا الماتى قالاسىنداعى رەسپۋبليكالىق دوستىق ۇيىندە ءوتتى. جيىنعا قازاقستان حالقى اسسامبلەياسى توراعاسىنىڭ ورىنباسارى، قر پرەزيدەنتى اكىمشىلىگىنىڭ قحا حاتشىلىعىنىڭ مەڭگەرۋشىسى مارات ءازىلحانوۆ توراعالىق ەتتى.
فورۋم جۇمىسىنا الماتى قالاسى اكىمدىگى، ەتنومادەني بىرلەستىكتەر مەن ۇكىمەتتىك ەمەس ۇيىمداردىڭ مۇشەلەرى، انالار كەڭەسىنىڭ مۇشەلەرى، قحا وڭىرلىك اقساقالدار كەڭەستەرىنىڭ توراعالارى قاتىستى.
جيىن بارىسىندا جىل باسىنان بەرى ەلىمىزدە اسسامبلەيا اياسىندا 1000-نان استام ءىس-شارا وتكەنىن، ونىڭ ىشىندە جاستارعا باعىتتالعان جوبالار مەن قوعامدىق كەلىسىمدى نىعايتۋعا ارنالعان باستامالاردىڭ كەڭ كولەمدە قامتىلعانىن جەتكىزدى.
ءوز سوزىندە مارات ءازىلحانوۆ ادال، ەلجاندى، جاۋاپكەرشىلىگى جوعارى ازاماتتاردى تاربيەلەۋدىڭ ماڭىزىن ەرەكشە اتاپ ءوتتى.
ء«بىزدىڭ ۇيلەستىرىپ جاتقان بارلىق جۇمىسىمىزدىڭ تۇپكى ماقساتى – ادال، پاتريوتتى، ەلىن سۇيەتىن ءارى جاۋاپكەرشىلىگى جوعارى ازاماتتى تاربيەلەۋ. وسى باعىتتا قولعا الىنعان “اقساقال تاعىلىمى” جوباسى – ءدال وسى ماقساتقا جاۋاپ بەرەتىن ناقتى باستاما»، – دەدى مارات الماسۇلى.
فورۋمدا الماتى قالاسى اكىمىنىڭ ورىنباسارى الماس قالدىبەكوۆ، انالار كەڭەسىنىڭ توراعاسى، بىرنەشە زيالىلار ءتۇرلى ۇسىنىستار ايتتى.
"ادال ازامات - ۇلت كەلبەتى" اتتى قحا اقساقالدار كەڭەستەرىنىڭ V رەسپۋبليكالىق فورۋمىندا "ادال ازامات " ءبىرتۇتاس تاربيە باعدارلاماسىنىڭ يدەولوگەماسى دا كەڭىنەن تالقىلاندى.
