قاسىم-جومارت توقاەۆ كوروناۆيرۋس ىندەتىنىڭ تارالۋ احۋالى جونىندەگى ۆەدومستۆوارالىق كوميسسيانىڭ وتىرىسىن وتكىزدى.
پرەزيدەنت اۋىر ناۋقاستاردىڭ كوبەيۋىنە بايلانىستى اۋرۋحانالاردى وتتەگى اپپاراتىمەن قامتاماسىز ەتۋ ماسەلەسى كۇن تارتىبىندەگى ەڭ باستى ماسەلە بولىپ وتىرعانىن جەتكىزدى.
«مەملەكەتتىك ورگاندار تاراپىنان ۇيلەستىرۋ بولماعاندىقتان، تۇرعىندار بۇل ماسەلەنى ءوز بەتىنشە شەشۋگە تىرىسۋدا. بۇل اقىلعا قونىمسىز! ۇكىمەت پەن اكىمدەر اۋرۋحانالاردى وتتەگىمەن قامتاماسىز ەتۋ ءۇشىن بەس كۇندىك مەرزىمگە يە بولادى»، - دەدى مەملەكەت باسشىسى.
قاسىم-جومارت توقاەۆ قالالارداعى جاعدايدى تۇراقتاندىرۋ كەزىندە اۋىل تۇرعىندارىن دا ۇمىتپاۋ كەرەك ەكەنىن اتاپ ءوتتى. ونىڭ ايتۋىنشا، بۇگىندە دياگنوستيكا مەن ەمدەۋ، قاجەتتى ءدارى-دارمەكتەر مەن پرەپاراتتار اۋىل تۇرعىندارىنا دۇرىس جەتپەي جاتىر.
«مەديتسينالىق كادرلاردىڭ جەتىسپەۋشىلىگى جانە قاجەتتى ينفراقۇرىلىم ماسەلەسى اۋىلدىق جەرلەردە وزەكتى بولىپ وتىر. ۇكىمەت 2300 امبەباپ ءموبيلدى بريگادالاردىڭ قۇرىلۋى تۋرالى حابارلادى. الايدا، ولار نەگىزىنەن قالا تۇرعىندارىنا قىزمەت ەتەدى. ءبىز اۋىلداردى قاراۋسىز قالدىرا المايمىز! مەن اۋىلداردى قاجەتتى ءدارى-دارمەكتەر مەن مەديتسينالىق جابدىقتارمەن قامتاماسىز ەتۋدى تاپسىرامىن»، - دەدى پرەزيدەنت.
"ادىرنا" ۇلتتىق پورتالى
