«تۇعىرى بيىك تارباعاتاي» اتتى ونەر جانە سپورت فەستيۆالىندە كوپتەن ايتىستان كورىنبەي كەتكەن رينات زايتوۆ سوڭعى ۋاقىتتا ەلىمىزدە بولعان وزگەرىستەر تۋرالى بان شىندىقتى جايىپ سالدى، دەپ حابارلايدى “ادىرنا” ۇلتتىق پورتالى.
قارسىلاسى ءبىرجان بايتۋوۆ تا قالىسار ەمەس.
“اي، رينات، شىڭعا بىتكەن شىنارسىڭدار،
كەي كەزدە كوز بايلايتىن تۇمانسىڭدار
“نۇر وتاندى” ايتتىڭ-اۋ، باسقاسىن دا،
نەگە سونشا ءبىزدى اكەپ سۇعارسىڭدار.
مەن ەرسەم، ءوز پاتشامنىڭ سوڭىنا ەردىم،
وعان نەسىن جەرىك اكەپ تىعارسىڭدار
سەن قۇساپ قوسانوۆقا ەرگەن جوقپىن،
وسىدان-اق ويىمدى ۇعارسىڭدار
“نۇر وتانىڭ” “امانات” بوپ كەتتى عوي دەپ،
ايتەۋىر اڭگىمەنى بۇرارسىڭدار.
ءوز قازاعىڭ ەمەس پە سونىڭ ءبارى،
قازاقتى نەسىن ورعا جىعارسىڭدار
اپىراي قولدارىڭا بيلىك بەرسە،
ءبارىمىزدى اياماي قىرارسىڭدار
800 مىڭ مۇشەسىن “نۇر وتاننىڭ”،
شەتىنەن حالىق جاۋى قىلارسىڭدار”، – دەدى ءبىرجان بايتۋوۆ.
رينات زايتوۆتىڭ جاۋابى:
”قوسانوۆتىڭ جايىن ايتتىڭ قايتا ماعان
وعان مەنىڭ ماڭدايىم شەرتىلگەن جوق.
قوسانوۆ سايلاۋدا، راس، ءبىر الدادى
ودان باسقا زيانىن كەلتىرگەن جوق.
سەنىڭ ەلباسىڭ سياقتى ءبىرجان دوسىم
التىنبەك، زامانبەكتى ولتىرگەن جوق.
دۋلات اعادىلدەردى اتتىرعان جوق،
قازاقتىڭ بايتاق جەرىن ساتتىرعان جوق.
كاسىپكەرلەر باستاعان جۇمىستاردى
تۋىستارى تارتىپ الىپ جاپتىرعان جوق.
قوسانوۆ حالىقتى ءبىر لاقتىرعانمەن،
نازارباەۆتاي وتىز جىل لاقتىرعان جوق…
…قاڭتاردىڭ جايىن ءبىلىپ ال ناقتى
ول كەزدە بيلىك حالىقتى ساتتى
اكىمدىكتى دە وزدەرى جاقتى،
تەرەزەنى دە وزدەرى شاقتى.
وزدەرى شاقتى، وزدەرى جاقتى
ايىپتى بىراق حالىققا تاقتى
ەكسترەميسسىڭ دەپ، تەرروريسسىڭ دەپ
مىلتىقپەن اتتى، تۇرمەگە جاپتى.
ايتاتىن بولسام قاڭتاردىڭ مۇڭىن
ەمى جوق جارا ماڭگىلىك مۇنىڭ
تۇرمەگە جاپتى، سابالاپ ءبىتتى
قازاقتىڭ قانشا قىزى مەن ۇلىن…
…توقاەۆ ءبارىن ۇعامىن دەدى
“جاڭا قازاقستان” قۇرامىن دەدى
بايلىقتىڭ ءبارىن ەلگە قايتارىپ،
قازاقتى باقىتتى قىلامىن دەدى.
…قاڭتاردا مەن دە قالادا ءجۇردىم
وسىنىڭ كورىپ كوزىممەن ءبارىن”، – دەپ جاۋاپ قاتتى رينات زايتوۆ.
https://t.me/adyrnaportal/6052
“ادىرنا” ۇلتتىق پورتالى
