ەلوردادا تابىستى كاسىپكەر بولا باستاعان كوپبالالى انالاردىڭ سانى كۇننەن-كۇنگە ارتۋدا. ولارعا كاسىپتى باستاۋعا مەملەكەتتىك باعدارلامالار كومەكتەسۋدە. بۇگىن ءبىز كوپبالالى انا عانا ەمەس، سونىمەن قاتار ەڭبەكقور، جىگەرلى بيزنەسۆۋمەن بولىپ تابىلاتىن ۇلجان قۇدايبەرگەنقىزى تۋرالى ايتاتىن بولامىز.
مىرزاگەلديەۆا ۇلجان قۇدايبەرگەنقىزى جوعارى ءبىلىمدى جوعارى ساناتتى 20 جىلدىق ەڭبەك ءوتىلى بار قازاق ءتىلى مەن ادەبيەتى ءپانىنىڭ مۇعالىمى. قازىرگى تاڭدا، الەۋمەتتىك كاسىپكەر.
- 2010 جىلى وقو-نىڭ "جىلدىڭ ۇزدىك ۇستازى" اتاعىن جەڭىپ الدى;
- 2011 جىلى ءمينيستردىڭ "ۇزدىك ۇستاز" ماراپاتىن يەلەنگەن;
- «امانات» پارتياسىنىڭ، وبلىستىق، قالالىق ءبىلىم باسقارمالارىنىڭ ماداقتارى، وبلىس، قالا اكىمدەرىنىڭ العىس حاتتارى;
- 2021 جىلى ەل پرەزيدەنتى قاسىم-جومارت كەمەلۇلى توقاەۆتىڭ "حالىق العىسى" مەدالىمەن ماراپاتتالدى.
ۇلجان حانىم بۇل كۇنگە دەيىن بىرنەشە كاسىپتى اشىپ كورگەن، كوپ تاجىريبە جيناعان. ءتىپتى، «مىقتى انالار» قورىنىڭ جەتەكشىسى بولىپ، كوپبالالى انالارعا كومەكتەسكەن. سونىمەن قاتار، ۇلجان قايىرىمدىلىقپەن كوپ اينالىسادى: ولار دەمەۋشىلەردى ىزدەپ، تاۋىپ، ازىق-تۇلىك، ءدارى-دارمەكتەردى مۇقتاج وتباسىلارعا تاراتادى;
اتامەكەن ۇكق ورتالىعىنىڭ "باستاۋ-بيزنەس" باعدارلاماسى بويىنشا وقىپ، 200 اەك كولەمىندە گرانت يەگەرى اتانعان مەن، 2021 جىلى "بيزنەستىڭ جول كارتاسى - 2025" باعدارلاماسى بويىنشا 5 ملن گرانت جەڭىپ، "Bilim all IT" وقۋ ورتالىعىن اشىپ، كوپبالالى وتباسىنىڭ بالالارى مەن ەرەكشە بالالاردى تەگىن وقىتىپ كەلەمىن.
كاسىپ باستاعان كەزدەگى كەدەرگىلەر - جالعا الاتىن عيماراتتىڭ جالداۋ قۇنى جوعارى بولدى، ويتكەنى او "سپك استانا" مەكەمەسىنەن عيمارات الۋ وتە قيىن. اكتيۆتەگى دايىن، رەمونتى بار عيماراتتار "مەن سەكىلدى" جانعا بەرىلمەيدى، جوندەۋ جۇمىسى جوق، جەرتولەدە ورنالاسقان بولمەلەردى ۇسىنادى. ال، ءوز قارجىسى جوق، جالدامالى پاتەردە تۇراتىن، 4 بالاسى بار اناعا ونداي قىمبات باعادا جوندەۋ جاساۋ قول جەتپەس دۇنيە...
بىراق، سارىارقا اۋدانىنىڭ اكىمى قولداۋ كورسەتىپ، دەمەۋشىلەردىڭ كومەگىمەن 3 ايعا عيمارات جالداپ بەرىپ، ءوز ءىسىمدى باستاپ، تابىسقا ىلىگىپ كەتتىم، -دەيدى ۇلجان حانىم.
- كاسىپتى باستاۋعا نە سەبەپ بولدى؟
- وسى جولعا كەلۋىمە سەبەپكەر بولعان ۇلىم – نۇرسۇلتان. جالعىزباستى انامىن.تاعدىردىڭ جازۋى بولار، ءالى باسپاناسىزبىن. تۇرعىن ۇيگە كەزەكتە تۇرمىز. قازىر پاتەر جالداپ تۇرامىز. بىراق، ءوز پاتەرىمىزدىڭ كىلتىن الاتىن كۇننىڭ جاقىن ەكەنىن سەزەمىن. 4 بالام بار - ۇلكەن ۇلىم سۇلتان بەيبارىس ديپلوم الىپ، جۇمىسقا ورنالاستى;
ەكىنشى ۇلىم نۇرسۇلتان بيىل مەكتەپتى "التىن بەلگىمەن" ءبىتىرىپ، ۇبتدان 114 بالل جيناپ، ەنۋدىڭ "ەكونوميكا جانە قارجى" ماماندىعىنا قۇجات تاپسىردى;
ۇلكەن قىزىم شۇعىلا، 2-سىنىپقا ءوتتى; كىشى قىزىم - رايان بالاباقشا تاربيەلەنۋشىسى.
وسىندان بىرنەشە جىل بۇرىن ۇلىم - نۇرسۇلتان، «نۇرسۇلتان زياتكەرلىك مەكتەبىنە» ءتۇسۋ ءۇشىن 6-سىنىپتا ءوز بەتىمەن دايىندالدى، ويتكەنى اقىلى تۇردە وقىتۋ كۋرستارىنا قاتىستىرۋ ءۇشىن مەندە ارتىق قاراجات بولمادى. 1 جىل بويى بار كۇشىمەن دايىندالعان ۇلىم نۇرسۇلتان زياتكەرلىك مەكتەبىنىڭ ەمتيحانىندا 790 بالل جيناپ رەزەرۆكە عانا ءىلىندى. سول كەزدە ۇلىم جىلاپ تۇرىپ ايتقان بولاتىن، "ەگەر بىزدە ارتىق اقشا بولعاندا، نزم باعدارلاماسىمەن دايىندايتىن كۋرستان وتكەنىمدە، نزم-گە ءتۇسۋشى ەدىم" دەپ...
ءبىر عانا مۇعالىمنىڭ جالاقىسىمەن كۇن كورىپ وتىرعان كوپبالالى انا قالاي بالانى قوسىمشا ورتالىققا بەرە الادى؟...
سودان مەن وسىنداي، ياعني كوپبالالى وتباسىنىڭ بالالارىنا موتيۆاتسيا بەرەتىن، ولاردىڭ شىعارماشىلىق قابىلەتىن دامىتاتىن وقۋ ورتالىعىن اشۋدى ارماندادىم.
شۇكىر، ءوز ادال ەڭبەگىمنىڭ ارقاسىندا اشتىم، ال نزم-گە ءتۇسۋدى ارمانداعان ۇلىمنىڭ جولى بولىپ، جوو-نا گرانتقا ءتۇسۋىن تىلەيمىز.
- ءوزىڭىزدىڭ "Bilim all IT" وقۋ ورتالىعىڭىز تۋرالى ايتا كەتسەڭىز؟
- قازىرگى تاڭدا مەن باسقارىپ وتىرعان "Bilim all IT" وقۋ ورتالىعىندا 115 وتباسىنىڭ 220 بالاسى تەگىن ءبىلىم الىپ جاتىر، ال ولارعا 18 مۇعالىم ءبىلىم بەرۋدە. بالالارعا ءبىلىم بەرۋدە ىزدەنىس، جاڭاشىلدىق مىندەتتى قاجەت. سول ءۇشىن "جاس مامانداردى الەۋمەتتىك وسال توپ بالالارىنا ءبىلىم بەرۋ ارقىلى پەداگوگيكالىق ەڭبەك تاجىريبەسىن جيناۋعا باۋلۋ ورتالىعى" جوباسىن قۇرىپ، وسى جوبا نەگىزىندە نۇر-سۇلتان قالاسى جۇمىسپەن قامتۋ ورتالىعىنان "جاستار پراكتيكاسى" باعدارلاماسى اياسىندا جاس مامانداردى جۇمىسپەن قامتىپ وتىرمىن. جاس ماماندار ۇيرەتە وتىرىپ، وزدەرى دە ۇيرەنەدى، الەۋمەتكە جاقىن بولۋدى ۇيرەنەدى!
وقۋ ورتالىعىندا تەك قانا ءبىلىم بەرىپ قويماي، قوسىمشا قايىرىمدىلىق ءىس-شارالارىن دا وتكىزىپ وتىرامىن. ونداي ءىس-شارالاردىڭ باسى-قاسىندا نۇر-سۇلتان قالاسى اكىمدىگى مەن سارىارقا اۋدانىنىڭ اكىمدىگى جۇرەدى. دەمەۋشىلەردىڭ قولداۋىمەن قانشاما مۇقتاج وتباسىلارعا ازىق-تۇلىك سەبەتىن، بالالارعا كيىم-كەشەك، اي سايىن قۇربان ەت، بالالاردى تەگىن قىدىرتۋ، بيىل وقۋ ورتالىعىنىڭ 50 بالاسى رەسپۋبليكالىق دەڭگەيدەگى "بالداۋرەن" لاگەرىنە تەگىن جولدامامەن دەمالىپ كەلدى. وسىنداي ۇلكەن قولداۋ ءبىلدىرىپ وتىراتىن باس قالا باسشىسىنا دا ايتار العىسىم شەكسىز!
- ءوز كاسىبىن باستاعىسى كەلەتىن قىز-كەلىنشەكتەرگە قانداي كەڭەس بەرەسىز؟
- ءوز كاسىبىن باستايمىن دەگەن قىز-كەلىنشەكتەرگە ايتارىم: ەشقاشان دا كەش ەمەس - باستاپ، اياققا نىق تۇرىپ، وزگەگە ۇلگى بولۋ ءۇشىن! ارەكەت ەتكەن ادام بەرەكەگە جولىعادى! ءوزىن سىيلاپ، قۇرمەتتەپ، جاقسى كورىپ ۇيرەنە وتىرىپ، الەمدى جاقسى كورە باستايدى!
ءار قازاق ءوز ەلىندە، سونشاما بايلىقتىڭ ۇستىندە ءومىر سۇرە وتىرىپ، باي بولۋعا لايىقتى!
ءسوز سوڭىندا ايتارىم، مەن سەكىلدى ءوز كاسىبىن باستايمىن دەگەن اناعا بالىق ەمەس، قارماق بەرگەن مەملەكەتتىك باعدارلامالاردىڭ قولداۋ تاپقانى دۇرىس! ۇكىمەت قولىنان كەلگەن كومەگىن جاساپ جاتىر، بۇرىڭعىداي ەمەس، قازىر حالىق ۇنىنە قۇلاق اساتىن مەملەكەت قاعيداتىن ۇستانعان باسشىلار كوبەيدى! ەندى سول باسشىلاردىڭ نازارى حالىققا اۋىپ، حالىق ءۇشىن قىزمەت اتقارۋىن قولداۋىمىز كەرەك! جاڭا قازاقستانعا بىرگە قادام جاسايىق.
- كاسىبىڭىزگە ساتتىلىك، سۇحباتىڭىزعا راحمەت.
