Elordada tabysty kásipker bola bastaǵan kópbalaly analardyń sany kúnnen-kúnge artýda. Olarǵa kásipti bastaýǵa memlekettik baǵdarlamalar kómektesýde. Búgin biz kópbalaly ana ǵana emes, sonymen qatar eńbekqor, jigerli bıznesvýmen bolyp tabylatyn Uljan Qudaıbergenqyzy týraly aıtatyn bolamyz.
Myrzageldıeva Uljan Qudaıbergenqyzy joǵary bilimdi joǵary sanatty 20 jyldyq eńbek ótili bar qazaq tili men ádebıeti pániniń muǵalimi. Qazirgi tańda, áleýmettik kásipker.
- 2010 jyly OQO-nyń "Jyldyń úzdik ustazy" ataǵyn jeńip aldy;
- 2011 jyly mınıstrdiń "Úzdik ustaz" marapatyn ıelengen;
- «Amanat» partııasynyń, oblystyq, qalalyq bilim basqarmalarynyń madaqtary, oblys, qala ákimderiniń Alǵys hattary;
- 2021 jyly El Prezıdenti Qasym-Jomart Kemeluly Toqaevtyń "Halyq alǵysy" medalimen marapattaldy.
Uljan hanym bul kúnge deıin birneshe kásipti ashyp kórgen, kóp tájirıbe jınaǵan. Tipti, «Myqty analar» qorynyń jetekshisi bolyp, kópbalaly analarǵa kómektesken. Sonymen qatar, Uljan qaıyrymdylyqpen kóp aınalysady: olar demeýshilerdi izdep, taýyp, azyq-túlik, dári-dármekterdi muqtaj otbasylarǵa taratady;
Atameken UKQ ortalyǵynyń "Bastaý-Bıznes" baǵdarlamasy boıynsha oqyp, 200 AEK kóleminde grant ıegeri atanǵan men, 2021 jyly "Bıznestiń jol kartasy - 2025" baǵdarlamasy boıynsha 5 mln grant jeńip, "Bilim all IT" oqý ortalyǵyn ashyp, kópbalaly otbasynyń balalary men erekshe balalardy tegin oqytyp kelemin.
Kásip bastaǵan kezdegi kedergiler - jalǵa alatyn ǵımarattyń jaldaý quny joǵary boldy, óıtkeni AO "SPK Astana" mekemesinen ǵımarat alý óte qıyn. Aktıvtegi daıyn, remonty bar ǵımarattar "men sekildi" janǵa berilmeıdi, jóndeý jumysy joq, jertólede ornalasqan bólmelerdi usynady. Al, óz qarjysy joq, jaldamaly páterde turatyn, 4 balasy bar anaǵa ondaı qymbat baǵada jóndeý jasaý qol jetpes dúnıe...
Biraq, Saryarqa aýdanynyń ákimi qoldaý kórsetip, demeýshilerdiń kómegimen 3 aıǵa ǵımarat jaldap berip, óz isimdi bastap, tabysqa iligip kettim, -deıdi Uljan hanym.
- Kásipti bastaýǵa ne sebep boldy?
- Osy jolǵa kelýime sebepker bolǵan ulym – Nursultan. Jalǵyzbasty anamyn.Taǵdyrdyń jazýy bolar, áli baspanasyzbyn. Turǵyn úıge kezekte turmyz. Qazir páter jaldap turamyz. Biraq, óz páterimizdiń kiltin alatyn kúnniń jaqyn ekenin sezemin. 4 balam bar - úlken ulym Sultan Beıbarys dıplom alyp, jumysqa ornalasty;
Ekinshi ulym Nursultan bıyl mektepti "Altyn belgimen" bitirip, UBTdan 114 ball jınap, ENÝdiń "ekonomıka jáne qarjy" mamandyǵyna qujat tapsyrdy;
Úlken qyzym Shuǵyla, 2-synypqa ótti; Kishi qyzym - Raıan balabaqsha tárbıelenýshisi.
Osyndan birneshe jyl buryn ulym - Nursultan, «Nursultan zııatkerlik mektebine» túsý úshin 6-synypta óz betimen daıyndaldy, óıtkeni aqyly túrde oqytý kýrstaryna qatystyrý úshin mende artyq qarajat bolmady. 1 jyl boıy bar kúshimen daıyndalǵan ulym Nursultan zııatkerlik mektebiniń emtıhanynda 790 ball jınap rezervke ǵana ilindi. Sol kezde ulym jylap turyp aıtqan bolatyn, "eger bizde artyq aqsha bolǵanda, NZM baǵdarlamasymen daıyndaıtyn kýrstan ótkenimde, NZM-ge túsýshi edim" dep...
Bir ǵana muǵalimniń jalaqysymen kún kórip otyrǵan kópbalaly ana qalaı balany qosymsha ortalyqqa bere alady?...
Sodan men osyndaı, ıaǵnı kópbalaly otbasynyń balalaryna motıvaııa beretin, olardyń shyǵarmashylyq qabiletin damytatyn oqý ortalyǵyn ashýdy armandadym.
Shúkir, óz adal eńbegimniń arqasynda ashtym, al NZM-ge túsýdi armandaǵan ulymnyń joly bolyp, JOO-na Grantqa túsýin tileımiz.
- Ózińizdiń "Bilim all IT" oqý ortalyǵyńyz týraly aıta ketseńiz?
- Qazirgi tańda men basqaryp otyrǵan "Bilim all IT" oqý ortalyǵynda 115 otbasynyń 220 balasy tegin bilim alyp jatyr, al olarǵa 18 muǵalim bilim berýde. Balalarǵa bilim berýde izdenis, jańashyldyq mindetti qajet. Sol úshin "Jas mamandardy áleýmettik osal top balalaryna bilim berý arqyly pedagogıkalyq eńbek tájirıbesin jınaýǵa baýlý ortalyǵy" jobasyn quryp, osy joba negizinde Nur-Sultan qalasy Jumyspen qamtý ortalyǵynan "Jastar praktıkasy" baǵdarlamasy aıasynda jas mamandardy jumyspen qamtyp otyrmyn. Jas mamandar úırete otyryp, ózderi de úırenedi, áleýmetke jaqyn bolýdy úırenedi!
Oqý ortalyǵynda tek qana bilim berip qoımaı, qosymsha qaıyrymdylyq is-sharalaryn da ótkizip otyramyn. Ondaı is-sharalardyń basy-qasynda Nur-Sultan qalasy ákimdigi men Saryarqa aýdanynyń ákimdigi júredi. Demeýshilerdiń qoldaýymen qanshama muqtaj otbasylarǵa azyq-túlik sebetin, balalarǵa kıim-keshek, aı saıyn qurban et, balalardy tegin qydyrtý, bıyl oqý ortalyǵynyń 50 balasy respýblıkalyq deńgeıdegi "Baldáýren" lagerine tegin joldamamen demalyp keldi. Osyndaı úlken qoldaý bildirip otyratyn Bas qala basshysyna da aıtar alǵysym sheksiz!
- Óz kásibin bastaǵysy keletin qyz-kelinshekterge qandaı keńes beresiz?
- Óz kásibin bastaımyn degen qyz-kelinshekterge aıtarym: eshqashan da kesh emes - bastap, aıaqqa nyq turyp, ózgege úlgi bolý úshin! Áreket etken adam berekege jolyǵady! Ózin syılap, qurmettep, jaqsy kórip úırene otyryp, álemdi jaqsy kóre bastaıdy!
Ár qazaq óz elinde, sonshama baılyqtyń ústinde ómir súre otyryp, baı bolýǵa laıyqty!
Sóz sońynda aıtarym, men sekildi óz kásibin bastaımyn degen anaǵa balyq emes, qarmaq bergen Memlekettik baǵdarlamalardyń qoldaý tapqany durys! Úkimet qolynan kelgen kómegin jasap jatyr, buryńǵydaı emes, qazir halyq únine qulaq asatyn memleket qaǵıdatyn ustanǵan basshylar kóbeıdi! Endi sol basshylardyń nazary halyqqa aýyp, halyq úshin qyzmet atqarýyn qoldaýymyz kerek! Jańa Qazaqstanǵa birge qadam jasaıyq.
- Kásibińizge sáttilik, suhbatyńyzǵa rahmet.
