تىم اكتۋالدى تاقىرىپقا اينالعان تۇرمىستىق زورلىق-زومبىلىق ماسەلەسىنە قاتىستى “ادىرنا” ءتىلشىسى بىلىكتى زاڭگەر ابزال قۇسپاننان پىكىر العان بولاتىن.
بۇل ماسەلەگە ول:
“سوڭعى كەزدەرى قوعامىمىزدا تۇرمىستىق زورلىق-زومبىلىققا قاتىستى نەشە ءتۇرلى جانتۇرشىگەرلىك وقيعالار، بەينەلەر، ءار ءتۇرلى حابارلار كوبەيىپ كەتكەنى سونشالىق، وسىعان قاتىستى نە ىستەۋىمىز كەرەك دەگەن ماسەلە اكتۋالدى تاقىرىپقا اينالىپ وتىر. مەنىڭ اۋەلگى جەكە پىكىرىم، بۇل جەردە سالدارمەن كۇرەسپەستەن بۇرىن، سەبەبىن انىقتاۋىمىز قاجەت. نەگىزگى سەبەپتىڭ ءبىرى رەتىندە مەن - ناداندىقتى اتاپ وتەر ەدىم. نادان ادامنىڭ پورترەتىن قالىپتاستىرعان كەزدە جوعارى ءبىلىمى بار، وقىعان، توقىعان ادام دەپ بىلمەۋىمىز كەرەك. ول ازامات ءبىر ەمەس بىرنەشە ءبىلىمى بار، وقىعان بولۋى مۇمكىن. بىراق ول ازامات ءوزىنىڭ وتكەن تاريحىن بىلمەيدى، مادەنيەتىنەن بەي-حابار جانە بولاشاعى تۋرالى باسىن قاتىرمايدى. ايتپەسە بولاشاعىن ويلايتىن ادام، ءوزىنىڭ بالالارىنىڭ اناسىن وسىلاي قورلاي ما؟ سوندىقتان ناداندىقپەن كۇرەسۋ قاي كەزدە دە، قاي ەلدە دە وتە اكتۋالدى ماسەلە. مەنىڭ ۇسىنىسىم، ارينە ءدال قازىرگى جاعدايدا قىلمىستىق اكىمشىلىك زاڭنامانى قاتايتۋ قاجەت تە شىعار، بىراق ول ماسەلەنى تۇبىرىمەن، تۇپكىلىكتى شەشپەيدى. ەڭ ءبىرىنشى كەزەكتە ءبىز بۇگىننەن باستاپ مەكتەپ تاربيەسىندە، ءتىپتى بالاباقشا دەڭگەيىندە تاربيە جۇمىستارىن قولعا الۋىمىز قاجەت. ەر ازاماتتىڭ وتباسى الدىنداعى جاۋاپكەرشىلىگى، ايەل ادامنىڭ وتباسى الدىنداعى مىندەتى، بالانىڭ اتا-انا الدىنداعى جاۋاپكەرشىلىگى سىندى دۇنيەنىڭ بارلىعى ءبىزدىڭ مادەنيەتىمىزدە بار. ءبىزدىڭ قيسسا داستاندارىمىز، ەرتەگى-جىرلارىمىز بۇل دۇنيەلەرمەن تولى. وسىنىڭ ءبارىن بالانىڭ ساناسىنا ءسىڭىرۋ ارقىلى ءبىز بۇل ماسەلەدەن تۇبەگەيلى قۇتىلا الامىز. ال تەك زاڭدى قاتايتۋ ءدال قازىرگى جاعدايدا بەلگىلى ءبىر دەڭگەيدە ستاتيستيكاعا اسەر ەتۋى مۇمكىن، بىراق تۇپكىلىكتى ماسەلەنى شەشپەيدى” دەپ جاۋاپ بەردى ابزال مىرزا.
https://t.me/adyrnaportal/6021
“ادىرنا” ۇلتتىق پورتالى
