قازگيدرومەت تامىز ايىنا ارنالعان قۇرعاقشىلىق بولجامىن جاريالايدى، دەپ حابارلايدى «ادىرنا» ءتىلشىسى.
«قىزىلوردا وبلىسىنىڭ قارماقشى اۋدانىندا، ماڭعىستاۋ وبلىسىنىڭ قاراقيا جانە ماڭعىستاۋ اۋداندارىندا قۇرعاقشىلىق بولادى دەپ بولجانىپ وتىر. سونداي-اق، اقتوبە وبلىسىنىڭ ايتەكە بي جانە مۇعالجار اۋداندارىندا، قاراعاندى وبلىسىنىڭ نۇرا اۋدانىندا، قوستاناي وبلىسىنىڭ امانگەلدى جانە جانگەلدى اۋداندارىندا جاۋىن-شاشىن تاپشىلىعى كۇتىلۋدە»،— دەلىنگەن حابارلامادا.
ال اقتوبە وبلىسىنىڭ سولتۇستىك جانە باتىس بولىگىندە، اتىراۋ وبلىسىنىڭ قىزىلقوعا اۋدانىندا، باتىس قازاقستان وبلىسىنىڭ سىرىم، كازتالوۆ جانە اقجايىق اۋداندارىندا كەرىسىنشە ىلعالدانۋدىڭ وڭتايلى جاعدايلارى كۇتىلۋدە. سونداي-اق الماتى وبلىسىنىڭ پانفيلوۆ جانە كەربۇلاق اۋداندارىندا دا ىلعالدى بولماق.
