تۋا ءبىتتى ەرەكشە جان بولسا دا، ءوزىن جان-جاقتى دامىتا بىلگەن قىزىلوردا وبلىسىنىڭ تۋماسى كاسىپكەر ءارى اقىن قۋانىش نۇرجىگىتوۆپەن “جاستاردى الەۋمەتتەندىرۋ جانە وڭالتۋ” جوباسى اياسىندا، “NEET جاستاردىڭ قۇندىلىعى” تاقىرىبىنداعى كەزدەسۋ ءوتتى. بۇل جوبا قر اقپارات جانە قوعامدىق دامۋ مينيسترلىگى مەن “ازاماتتىق باستامالاردى قولداۋ ورتالىعىنىڭ” قولداۋىمەن ىسكە اسۋدا.
“ادىرنا” ۇلتتىق پورتالىنىڭ پرەزيدەنتى ارمان اۋباكىر كەزدەسۋ بارىسىندا قۋانىش نۇرجىگىتوۆكە “العىس حات” بەردى.
جاس كاسىپكەر ءارى ونەر جولىنا قادام باسقان جاس اقىن قۋانىش مىرزا “ادىرنا” تىلشىسىنە دە قىسقا سۇحبات بەردى.
-قۋانىش مىرزا، ءوزىڭىزدى وقىرماندارعا تولىعىراق تانىستىرا كەتسەڭىز؟
-ءبىز وسىدان 2 جىل بۇرىن انام ەكەۋمىز قۇرت ونىمدەرىن ساتاتىن “اق جايلاۋ” اتتى دۇكەنىمىزدى اشقان بولاتىنبىز.
كاسىپتەن بولەك قازىر ونەر سالاسىندا دا ءجۇرمىن. اراسىندا ولەڭ جازاتىن قاسيەتىم دە بار.
ءوزىم ءتورت اعايىندىمىن. جاسىم 20 دا، ءبىرىنشى توپتاعى مۇگەدەك جانمىن.
قازىر كاسىبىم كىشكەنە توقتاپ تۇر، الايدا ءارى قاراي جالعاستىرامىن. ونەر جاعىنا كەلەر بولساق، جەتكەن جەتىستىكتەرىم كوپ. ديپلومدارىم بار. ولەڭ جازىپ جۇرگەنىمە 3 جىلداي بولىپ قالدى. تۋعان كۇنىم تامىزدىڭ 12-ءسى. سوعان وراي، قىزىلوردا جاستارى ورتالىعىندا شىعارماشىلىق كەشىم بولادى. قازىر سوعان دايىندىق قىزۋ ءجۇرىپ جاتىر.
-قازىرگى تاڭدا، قانداي ارمان، ماقساتىڭىز بار؟
-اتىراۋدانمىن دەدىڭىز عوي ءيا، قاتەلەسپەسەم، ماڭعىستاۋ سىزدەرگە جاقىن عوي؟
سول ماڭعىستاۋدان شىققان مۇرات قوجا، ايگۇل قوسانوۆا، اقىلبەك جەمەنەي اعالارىمىزدىڭ اندەرىن تىڭدايمىن. سول كىسىلەردىڭ اندەرىن تىڭداپ ءوستىم. ىزدەرىن باسىپ كەلە جاتىرمىن.
مەنىڭ ارمانىم، اقىلبەك جەمەنەي اعاممەن كەزدەسسەم دەپ ويلاپ ءجۇر ەدىم. اعاممەن ءبىر ساحنادا ءان ايتقىم كەلەدى. اندەرىن جاتقا بىلەمىن. ەلگە تانىمال اندەرى وتە كوپ قوي.
-ءوزىڭىز ساحنامەن دوسسىز با؟
-مەن دە ساحناعا شىعىپ جۇرگەن ءانشىمىن. قىزىلوردادا وتكەن مۇمكىندىگى شەكتەۋلى جانداردىڭ اراسىندا وتكەن “جىگىت سۇلتانى” بايقاۋىنىڭ جەڭىمپازىمىن.
-ءوزىڭىزدى جان-جاقتى دامىتقان ەكەنسىز. ءوزىڭىز سەكىلدى جاس بۋىنعا قانداي كەڭەس ايتاسىز؟
-ارزان كۇلكىگە كەلەتىن بولساق، بىزگە ونىڭ ەش قاجەتى جوق. قازىرگى جاستار ارزان كۇلكىگە قارق بولىپ، ادامداردى شەتتەتىپ، مازاقتاپ جاتادى. ونى قۇپتامايمىن.
كوبىنە جاستار شەتەلدىڭ اندەرىن اندەرىن كوپ تىڭدايدى. ونىڭ بىزگە قاجەتى شامالى. ويتكەنى، ونىڭ ورنىنا قازاقتىڭ حالىق اندەرىن، ءداستۇرلى اندەرىن، دومبىراسىن تىڭداۋ كەرەك دەپ ويلايمىن.
ءوزىم ۇيدە بوس ۋاقىتىمدا، كاسىپتەن بولەك، دومبىرا تارتامىن. جاس ايتىسكەر اقىنمىن. ءبىراز اقىندارمەن كەزدەسكەنمىن.
اتىراۋدان قاتەلەسپەسەم، يساحاەۆ سالاۋات دەگەن اعامىز بار. جاتقان جەرى جايلى بولسىن. كەرەمەت ايتىسكەر ەدى...
جالپى، جاستارعا ايتارىم، شەتەلگە ەلىكتەگەنشە، قازاقتىڭ ءوز اندەرىمەن سۋسىنداعان ءجون.
بالەدەن اۋلاق بوپ، جاماندىققا ەرمەي، جاقسىلىققا ىلەسكەن وتە دۇرىس قادام.
بىرەۋدىڭ اقىلىن تىڭداعانشا، ءوز اقىلىمىزدى پايدالانىپ، ءوز ەركىندىگىمىز بولۋى كەرەك.
وتانىمىز ءوزىم سياقتى ەل جاستارىنان ۇلكەن ءۇمىت كۇتىپ وتىر.
پرەزيدەنتىمىز ايتقانداي، جاڭا قازاقستاندا جاڭا وزگەرىستەر بولۋى كەرەك.
سۇحباتتاسقانىڭىزعا راقمەت!
“ادىرنا” ۇلتتىق پورتالى
