7 جىلعا سوتتالعان قىزىلوردا وبلىسىنىڭ ەكس- اكىمى قۋانىشبەك ىسقاقوۆتىڭ جازا مەرزىمى قىسقاردى دەپ حابارلايدى "ادىرنا" ۇلتتىق پورتالى.
قىزىلوردا قالاسىنىڭ №2 سوتىنىڭ مالىمدەۋىنشە، ۇكىم وزگەرتىلىپ، باس بوستاندىعىنان ايىرۋ مەرزىمى التى جىلعا دەيىن قىسقارتىلدى.
«قىزىلوردا وبلىستىق سوتىنىڭ قىلمىستىق ىستەر جونىندەگى سوت القاسىنىڭ قاۋلىسىمەن ءبىرىنشى ۇكىم وزگەرىسسىز قالدىرىلدى. جوعارعى سوتتىڭ قىلمىستىق ىستەر جونىندەگى سوت القاسىنىڭ قاۋلىسىمەن جازا تاعايىنداۋ بولىگىندەگى ۇكىم وزگەرتىلىپ، باس بوستاندىعىنان ايىرۋ مەرزىمى التى جىلعا دەيىن قىسقارتىلدى. ىسقاقوۆ سوتتان جازانىڭ وتەلمەگەن بولىگىن جازانىڭ نەعۇرلىم جەڭىل تۇرىمەن، ياعني ايىپپۇل نەمەسە باس بوستاندىعىن شەكتەۋ تۇرىندەگى جازامەن اۋىستىرۋدى سۇرادى»، – دەلىنگەن حابارلامادا.
ۆەدومستۆودا اتاپ وتكەندەي، بۇرىن زك-169/5 كولونياسىنىڭ وكىلى سوتتالعانعا ۇسىنىلعان مىنەزدەمەنى قولداپ، جازانى وتەۋ بارىسىندا ەكس-اكىم «بەلگىلەنگەن ىشكى ءتارتىپ ەرەجەلەرى مەن رەجيم تالاپتارىن» بۇزباعانىن ناقتىلادى.
««سوت وعان قاتىستى ەكى جەڭىلدەتۋ شاراسى قولدانىلدى. جازاسى جوق، جەڭىل جاعدايدا جازاسىن وتەپ جاتىر، دارەجەسى ەكىنشى وڭ، قىلمىسپەن كەلتىرىلگەن مۇلىكتىك زالال، مەملەكەتتىك باج، مەملەكەت كىرىسىنە پروتسەسسۋالدىق شىعىندار جانە وتەماقى تولىعىمەن وتەلدى. جازانى وتەۋدىڭ بەلگىلەنگەن ءتارتىبىن قاساقانا بۇزۋ دەرەگى جوق. جابىرلەنۋشىنىڭ وكىلى جازانىڭ وتەلمەگەن بولىگىن نەعۇرلىم جەڭىل جازامەن اۋىستىرۋ تۋرالى وتىنىشكە قارسى ەمەس ەكەنىن كورسەتتى. وسىنىڭ نەگىزىندە سوتتالعان ىسقاقوۆتىڭ جازانىڭ وتەلمەگەن بولىگىن جازانىڭ نەعۇرلىم جەڭىل تۇرىمەن اۋىستىرۋ تۋرالى ءوتىنىشى قاناعاتتاندىرىلدى. جازانىڭ وتەلمەگەن بولىگى نەعۇرلىم جەڭىل جازا – 3 جىل 11 اي 12 كۇن مەرزىمگە باس بوستاندىعىن شەكتەۋمەن اۋىستىرىلدى. قوسىمشا جازا ءتۇرىن وتەۋدەن بوساتىلمايدى»، - دەپ جازىلعان حابارلامادا.
ەستەرىڭىزگە سالا كەتەيىك، قىزىلوردا وبلىسىنىڭ بۇرىنعى اكىمى قۋانىشبەك ىسقاقوۆ 2020 جىلى جەلتوقساندا الاياقتىق جاساعانى ءۇشىن كىنالى دەپ تانىلىپ، 7 جىلعا باس بوستاندىعىنان ايىرىلعان ەدى.
"ادىرنا" ۇلتتىق پورتالى
