بۇگىن قىزىلوردا قالاسىندا ۇكىمەتتىك ەمەس ۇيىمدار ءۇيىنىڭ اشىلۋ سالتاناتى ءوتتى. ايماق باسشىسىنىڭ وبلىستىق قازاقستان حالقى اسسامبلەياسىنىڭ ءححىV سەسسياسىندا بەرگەن تاپسىرماسى نەگىزىندە اشىلعان اتالمىش نىسان ۇكىمەتتىك ەمەس ۇيىمدار ءۇشىن رەسۋرستىق ورتالىق قىزمەتىن اتقاراتىن بولادى.
ورتالىقتىڭ اشىلۋ سالتاناتىنا وبلىس اكىمى اپپاراتىنىڭ باسشىسى ش.بايمانوۆ، وبلىستىق ءماسليحات حاتشىسى ن.بايقاداموۆ، وبلىستىق ارداگەرلەر كەڭەسىنىڭ توراعاسى س.دۇيسەنباەۆ، قوعامدىق دامۋ باسقارماسىنىڭ باسشىسى م.قازبەكوۆا، زيالى قاۋىم وكىلدەرى، ۇكىمەتتىك ەمەس ۇيىمدار مەن باق وكىلدەرى قاتىستى.
بۇل باستاما وسىدان ەكى اي بۇرىن ۇەۇ-مەن كەزدەسۋ بارىسىندا كوتەرىلىپ، ۇسىنىس ايماق باسشىسىمەن قولداۋ تاپتى.
«ايماعىمىزدا ۇكىمەتتىك ەمەس ۇيىمدار سانى جىلدان-جىلعا كوبەيىپ كەلەدى. بۇل ازاماتتىق سەكتوردىڭ جاۋاپكەرشىلىگى مەن بەلسەندىلىگىنىڭ ارتقانىن كورسەتەدى. تاۋەلسىزدىك العان جىلدارى وبلىستاعى قوعامدىق ۇيىمدار سانى 15 بولسا، بۇگىندە ولاردىڭ قاتارى 1200-گە جۋىقتادى. ونىڭ 454-ءى ءوڭىردىڭ رۋحاني-مادەني، قوعامدىق ومىرىنە بەلسەندى ارالاسىپ، ءوز ۇلەستەرىن قوسىپ كەلەدى»، - دەدى وبلىس اكىمى اپپاراتىنىڭ باسشىسى ش.بايمانوۆ.
بۇگىنگى كۇنى وبلىستىق جانە اۋداندىق اكىمدىكتەر جانىنداعى كەڭەستەر مەن كوميسسيالار قۇرامىندا 100 ۇكىمەتتىك ەمەس ۇيىم وكىلدەرى ەنگىزىلگەن. وڭىرلىك ۇكىمەتتىك ەمەس ۇيىمدارمەن ءوزارا ءىس-قيمىل جانە ىنتىماقتاستىق جونىندەگى وبلىس اكىمدىگى جانىنداعى كەڭەس تۇراقتى جۇمىس جاسايدى. كەڭەستىڭ قۇرامىنا مەملەكەتتىك مەكەمە باسشىلارى، بارلىق سالا بويىنشا ۇكىمەتتىك ەمەس ۇيىمدار، «ازاماتتىق اليانس» قاۋىمداستىعىنىڭ قالا جانە اۋداندارداعى وكىلدەرى مەن قوعام بەلسەندىلەرى ەنگىزىلگەن.
پايدالانۋعا بەرىلگەن ورتالىق ايماقتا ازاماتتىق باستامالاردىڭ دامۋىنا، بەلسەندى ۇيىمداردىڭ سانى مەن ساپالىق قۇرامىنىڭ ارتۋىنا، جاڭا يدەيالاردىڭ شىعۋى جانە قوعامدىق ءومىردىڭ جاندانۋىنا سەپتىگىن تيگىزەدى. مۇندا ۇكىمەتتىك ەمەس ۇيىمداردىڭ سان-سالالى باعىتتا جۇمىس ىستەۋىنە تولىق مۇمكىندىكتەر جاسالعان. اتاپ ايتقاندا، ينتەرنەت جەلىسىنە قوسىلعان كومپيۋتەرلەر، نوۋتبۋكتەر لازەرلى جانە ءتۇرلى-ءتۇستى پرينتەر، كەڭسە تاۋارلارى جانە ت.ب. قامتاماسىز ەتىلگەن.
ورتالىقتا ءتۇرلى تاقىرىپتاردا سەمينار-ترەنينگتەر، كەزدەسۋلەر، دوڭگەلەك ۇستەلدەر، وقىتۋ كۋرستارى، كونفەرەنتسيالار، تانىمدىق شارالار وتكىزۋ ارقىلى، ايماعىمىزدىڭ ۇكىمەتتىك ەمەس ۇيىمدارى ءۇشىن مۇمكىندىكتەر الاڭىنا اينالدىرۋ جوسپاردا بار. وسى ورايدا، ورتالىق جۇمىسىن ۇيلەستىرۋ ءۇشىن، وبلىستىق قوعامدىق دامۋ باسقارماسىنان ارنايى 6 مامانى ءبولىنىپ، ۇيىمدارعا ادىستەمەلىك كومەكتەر كورسەتەتىن بولادى.
"ادىرنا" ۇلتتىق پورتالى
