ءوزىن "پروكۋروردىڭ ايەلىمىن" دەپ كۇزەتشىگە دورەكىلىك تانىتقان 38 جاستاعى جاينا ۋرازالينا بولعان وقيعانىڭ ءمان-جايىن ءتۇسىندىرىپ، كوپشىلىكتەن كەشىرىم سۇرادى، دەپ جازادى "ادىرنا" ۇلتتىق پورتالى.
جاينا ۋرازالينانىڭ ايتۋىنشا، وقيعا بولعان كۇنى كۇندىزگى ساعات 14:00 شاماسىندا ول بالالارىن سپورت كلۋبىنا اكەلگەن. بالالارىنا دۇكەننەن سۋسىن الۋ ءۇشىن كولىگىن مەكەمە الدىنداعى تۇراققا قويعان. الايدا كلۋبتىڭ ارتىندا ورنالاسقان اكىمشىلىك عيماراتتان كۇزەتشى سىرتقا شىعىپ، دورەكى تۇردە كولىكتى تۇراقتان الىپ تاستاسىن دەگەن.
"مەن وعان "قازىر دۇكەنگە بارىپ كەلەيىن، سوسىن كولىكتى الىپ تاستايمىن"دەدىم. ول مەنىڭ اناما قاتىستى بوقاۋىز ءسوزدى ايتىپ، بالاعاتتادى. ءسويتىپ مەن ول عيماراتقا كىرىپ، باسشىسىن ىزدەدىم. ول ونىڭ ورنىندا جوق ەكەنىن ايتتى. سودان كەيىن مەن ودان ءوزىمنىڭ، بالالارىمنىڭ الدىندا كەشىرىم سۇراۋىن تالاپ ەتتىم. ول تاياعىن الىپ، ماعان جانە بالالارىما باس سالدى. مەنىڭ بالالارىم قورقىپ كەتتى، قىزىم جىلادى. ول انامدى، مەنى جانە بالالارىمدى قورلاپ، نامىسىمىزعا ءتيدى»، – دەيدى ول.
ايەل جانجال بارىسىندا كۇيەۋىن نە ءۇشىن پروكۋرور دەپ ايتقانىن ءتۇسىندىرىپ بەردى.
"بىرنەشە قىزمەتكەرلەر ماعان جابىلعاننان كەيىن كۇيەۋىم پروكۋرور دەپ اشۋلانعاننان ايتا سالدىم. مەكەمە قىزمەتكەرلەرىنەن كەشىرىم سۇراعىم كەلەدى. كەشە سوت وتىرىس ءوتتى. ماعان اكىمشىلىك جازا تاعايىندادى. مەن ءوز كىنامدى مويىندادىم. دەگەنمەن، مەن سوتتا شىن مانىندە وقيعانىڭ قالاي بولعانىن ايتىپ بەردىم. اتا-انامىزعا قاتىستى بالاعات سوزدەر ايتۋعا ەشكىمنىڭ قۇقىعى جوق", — دەدى ول.
"ادىرنا" ۇلتتىق پورتالى
