باتىس قازاقستان وبلىسىندا كوپ بالالى، كاسىپكەر ايەلدەردىڭ ساندارى كۇن ساناپ وسۋدە. بۇدان وبلىس ەكونوميكاسىنىڭ ءوسۋىن دە بايقاۋعا بولادى. سولاردىڭ ءبىرى رەتىندە اۋىلدا بولسا دا، دەموگرافيامەن قاتار وڭىردەگى شاعىن كاسىپتى دامىتۋعا ءوز ۇلەسىن قوسىپ جۇرگەن كوپبالالى انا بورانقۇلوۆا انارگۇل قالامعاليقىزى تۋرالى ايتا كەتكىمىز كەلەدى.
جەكە كاسىپكەر 1983 جىلى 4 اقپاندا سىرىم اۋدانى، شاعىرلوي اۋىلىندا دۇنيەگە كەلگەن. 1999 جىلى مەكتەپ ءبىتىرىپ، 2000 جىلى تۇرمىس قۇرعان. كوپ بالالى انا. 3 ۇل، 3 قىزى بار. كۇمىس القا يەگەرى. ماماندىعى - اسپازشى. ءتۇرلى جەكە شارۋاشىلىقتاردا قىزمەت اتقارعان.
جۇمىسپەن قامتۋ ورتالىعى ارقىلى 2019 جىلى 505 مىڭ تەڭگە قايتارىمسىز گرانت الىپ ۇيىنەن نان ءپىسىرۋ كاسىبىن اشقان. 2020 جىلى كارانتينگە بايلانىستى جۇمىسسىز قالىپ، ءوز كاسىبىن اشۋدى ويلاعان.
«2012 جىلدان باستاپ «تاماشا» مەيرامحاناسىندا اسپازشى بولىپ جۇمىس جاسادىم. كوپ تاجىريبە جينادىم، باستىعىم بولعان نۇرمىحانوۆا ايدادان كوپ نارسە ءبىلدىم، ارقاشان قولداپ وتىرادى. بىراق، 2020 جىلى كارانتين كەزىندە ءبىز جۇمىسسىز قالدىق. بالالالار ءوسىپ كەلە جاتتى، بالالارىما كارانتين كەزىندە اقشا تابۋ قيىنعا تۇسە باستادى. كوپ بالالى انامىن، ماعان انانى بەرىڭدەر، مىنانى بەرىڭدەر دەپ ەشكىمگە قول جايعان ەمەسپىن. مەملەكەتتىڭ بەرگەن جاردەماقىسىنا عانا قاراپ وتىرماي، ەڭبەك ەتۋدى ەشقاشان ۇمىتقان ەمەسپىز. ءبىر كۇنى قايتارىمسىز گرانت الىپ، وقىپ جاتقان جاستاردى مەيرامحانادان كوردىم. گرانت بەرۋشىلەر ءبىزدىڭ مەيرامحانانى جالعا الىپ، كۇندە ساباق وتەتىن. جۇمىستا ءجۇرىپ مەندە دە قىزىعۋشىلىق تۋدى. مەن دە نەگە وقىماسقا دەپ جۇمىسپەن قامتۋ ورتالىعىنا باردىم. كوپ بالالى انا رەتىندە الا الاتىنىمدى ايتتى. وقىدىم، گرانتتى الدىم. ەندى، قانداي كاسىپ اشامىن دەگەندە، پەش ساتىپ الىپ، نان ءپىسىرىپ، ساتا باستادىم. ءبىرىنشى كورشىلەرگە، كەيىن اكىمشىلىك جاقتا ساتتىم»،— دەيدى انارگۇل حانىم.
نان ساتۋ ازداۋ بولعان سوڭ ۇيدەن ءارتۇرلى بالىشتەر جاساپ ساتۋدى قولعا العان ەكەن. كوپ تاپسىرىستى ۇيدەن جاساۋ قيىندىق تۋعىزعاسىن، جەكە عيمارات ىزدەستىرىپ، ورتالىقتان يەسىز قالعان ءۇيدى تابادى. نەسيە الىپ، سول ءۇيدى ساتىپ الىپ، جولداسىمەن بىرگە جوندەپ، «بەرەكە» اسحاناسىن اشىپ 2 ادامدى جۇمىسپەن قامتىپ وتىر.
«ءالى دە كەڭەيۋ ۇستىندەمىز. اسحانانىڭ جالپى سىيىمدىلىعى 24 ورىندى قۇرايدى. الداعى ۋاقىتتا كاسىبدى كەڭەيتىپ، بانكەت زالىن جانە ناۋبايحانا اشۋ جوسپاردا بار.بىرتىندەپ-بىرتىندەپ العا ماقسات قويسا، جەتۋگە بولاتىنىنا كوزىمىز جەتتى. كەيدە ساۋدا بولمايتىن كەزدەر دە نەمەسە شارشاعان كەزدەر بولادى. سوندا دا بەرىلمەيمىز. كەيدە قوسىمشا قوناق شاقىرعان ۇيلەردىڭ داستارحانىن دا دايىنداپ بەرەمىن. بالالارىمىز ءۇشىن ەڭبەكتەنۋدەمىز. جولداسىم مەكتەپتە كۇزەتشى. بوس ۋاقىتىندا ارقاشان كومەكتەسەدى. ەكى ستۋدەنت قىزىم بار. ولار دا بوس ۋاقىتىندا كومەكتەسەدى. ۇلدارىم دا ۇنىمدى اكەلىپ، قولعابىس بەرۋدە. سوندىقتان، ەڭبەكتەنسەك، بارىنە جەتەمىز»،— دەپ ءسوزىن قورىتىندىلادى ول.
«ادىرنا» ۇلتتىق پورتالى
