Batys Qazaqstan oblysynda kóp balaly, kásipker áıelderdiń sandary kún sanap ósýde. Budan oblys ekonomıkasynyń ósýin de baıqaýǵa bolady. Solardyń biri retinde aýylda bolsa da, demografııamen qatar óńirdegi shaǵyn kásipti damytýǵa óz úlesin qosyp júrgen kópbalaly ana Boranqulova Anargúl Qalamǵalıqyzy týraly aıta ketkimiz keledi.
Jeke kásipker 1983 jyly 4 aqpanda Syrym aýdany, Shaǵyrloı aýylynda dúnıege kelgen. 1999 jyly mektep bitirip, 2000 jyly turmys qurǵan. Kóp balaly ana. 3 ul, 3 qyzy bar. Kúmis alqa ıegeri. Mamandyǵy - aspazshy. Túrli jeke sharýashylyqtarda qyzmet atqarǵan.
Jumyspen qamtý ortalyǵy arqyly 2019 jyly 505 myń teńge qaıtarymsyz grant alyp úıinen nan pisirý kásibin ashqan. 2020 jyly karantınge baılanysty jumyssyz qalyp, óz kásibin ashýdy oılaǵan.
«2012 jyldan bastap «Tamasha» meıramhanasynda aspazshy bolyp jumys jasadym. Kóp tájirıbe jınadym, bastyǵym bolǵan Nurmyhanova Aıdadan kóp nárse bildim, árqashan qoldap otyrady. Biraq, 2020 jyly karantın kezinde biz jumyssyz qaldyq. Balalalar ósip kele jatty, balalaryma karantın kezinde aqsha tabý qıynǵa túse bastady. Kóp balaly anamyn, maǵan anany berińder, mynany berińder dep eshkimge qol jaıǵan emespin. Memlekettiń bergen járdemaqysyna ǵana qarap otyrmaı, eńbek etýdi eshqashan umytqan emespiz. Bir kúni qaıtarymsyz grant alyp, oqyp jatqan jastardy meıramhanadan kórdim. Grant berýshiler bizdiń meıramhanany jalǵa alyp, kúnde sabaq ótetin. Jumysta júrip mende de qyzyǵýshylyq týdy. Men de nege oqymasqa dep jumyspen qamtý ortalyǵyna bardym. Kóp balaly ana retinde ala alatynymdy aıtty. Oqydym, grantty aldym. Endi, qandaı kásip ashamyn degende, pesh satyp alyp, nan pisirip, sata bastadym. Birinshi kórshilerge, keıin ákimshilik jaqta sattym»,— deıdi Anargúl hanym.
Nan satý azdaý bolǵan soń úıden ártúrli bálishter jasap satýdy qolǵa alǵan eken. Kóp tapsyrysty úıden jasaý qıyndyq týǵyzǵasyn, jeke ǵımarat izdestirip, ortalyqtan ıesiz qalǵan úıdi tabady. Nesıe alyp, sol úıdi satyp alyp, joldasymen birge jóndep, «Bereke» ashanasyn ashyp 2 adamdy jumyspen qamtyp otyr.
«Áli de keńeıý ústindemiz. Ashananyń jalpy syıymdylyǵy 24 oryndy quraıdy. Aldaǵy ýaqytta kásibdi keńeıtip, banket zalyn jáne naýbaıhana ashý josparda bar.Birtindep-birtindep alǵa maqsat qoısa, jetýge bolatynyna kózimiz jetti. Keıde saýda bolmaıtyn kezder de nemese sharshaǵan kezder bolady. Sonda da berilmeımiz. Keıde qosymsha qonaq shaqyrǵan úılerdiń dastarhanyn da daıyndap beremin. Balalarymyz úshin eńbektenýdemiz. Joldasym mektepte kúzetshi. Bos ýaqytynda árqashan kómektesedi. Eki stýdent qyzym bar. Olar da bos ýaqytynda kómektesedi. Uldarym da unymdy ákelip, qolǵabys berýde. Sondyqtan, eńbektensek, bárine jetemiz»,— dep sózin qorytyndylady ol.
«Adyrna» ulttyq portaly
