«وليمپ» بۋكمەكەرلىك كەڭسەسىنىڭ ىسىنە قاتىستى جاڭا مالىمەتتەر شىقتى، دەپ حابارلايدى “ادىرنا” ۇلتتىق پورتالى Sputnik.kz سايتىنا سىلتەمە جاساپ.
ەكونوميكالىق رەسۋرستاردىڭ زاڭسىز شوعىرلانۋىنا قارسى ءىس-قيمىل ماسەلەلەرى جونىندەگى كوميسسيا قازىر «وليمپ» بۋكمەكەرلىك كەڭسەسىنىڭ لاۋازىمدى تۇلعالارىنا قاتىستى قىلمىستىق ءىس اياسىندا تاركىلەنگەن 5,5 ملن اقش دوللارى مەن 200 مىڭ ەۋرونى ۇلتتىق بانككە اۋدارۋ پروتسەدۋراسى ءجۇرىپ جاتقانىن مالىمدەدى.
«بۇدان بولەك، قاپشاعاي قالالىق سوتىنىڭ 95 ملرد تەڭگە شىعىن كەلتىرگەن وسى بۋكمەكەرلىك كەڭسەنىڭ باسشىسى س. ەسىمدى ازاماتتى قونىس-كولونياعا اۋىستىرۋ تۋرالى 2022 جىلعى 6 ماۋسىمداعى قاۋلىسىنىڭ كۇشىن جويۋ تۋرالى جەكە قولداۋحات ەنگىزىلدى»، - دەپ مالىمدەدى كوميسسيا.
وسى ءىس بويىنشا مەملەكەت پايداسىنا 3,6 ملرد تەڭگە تاركىلەندى. اتاپ ايتقاندا، 4 ۇشاق، 5 جەر ۋچاسكەسى، 15 اۆتوكولىك، الماتى قالاسىندا 30 جىلجىمايتىن مۇلىك (تۇرعىن ءۇي جانە تۇرعىن ءۇي ەمەس نىساندار).
«وليمپ» ءىسى
2019 جىلى جەلتوقسان ايىنىڭ باسىندا ۇلتتىق قاۋىپسىزدىك كوميتەتىنىڭ الماتى قالاسى بويىنشا دەپارتامەنتى قازاقستاندا «وليمپ» بۋكمەكەرلىك كەڭسەسى جەلىسىنىڭ قىزمەتى ۋاقىتشا توقتاتىلعانىن مالىمدەگەن بولاتىن.
تەرگەۋ مالىمەتىنە سۇيەنسەك، كومپانيا قازاقستان زاڭناماسىن بۇزعان جانە ينتەرنەت-رەسۋرستاردى پايدالانۋ ارقىلى زاڭسىز قىزمەتپەن اينالىسقان. ال تۇسكەن تابىستان سالىق تولەمەگەن.
كەيىنىرەك «وليمپ» ليتسەنزيانى جارتى جىلعا توقتاتا تۇرۋ تۋرالى سوت شەشىمىنە شاعىم تۇسىرۋگە نيەتتى ەكەنىن حابارلادى.
2019 جىلعى 18 جەلتوقساندا الماتى پروكۋراتۋراسى «وليمپ» بۋكمەكەرلىك كەڭسەسىن مەملەكەتكە 145 ملرد تەڭگە تولەۋگە مىندەتتەدى. شەشىم قالالىق مەملەكەتتىك كىرىستەر دەپارتامەنتى جۇرگىزگەن سالىق تەكسەرىسى ناتيجەسى بويىنشا قابىلداندى.
«وليمپ» بۋكمەكەرلىك كەڭسەسىنىڭ قىزمەتىن تەكسەرۋ جارتى جىلعا سوزىلدى. 2020 جىلدىڭ باسىندا بۋكمەكەرلىك كەڭسە ستاۆكا قابىلداۋدى توقتاتتى.
كەيىن «OlimpKZ بۋكمەكەرلىك كەڭسەسى» جشس باسشىلارىنا حالىقارالىق ىزدەۋ جاريالاندى.
باسشىلارعا بۋكمەكەرلىك قىزمەت اتىن جامىلىپ، زاڭسىز ويىن بيزنەسىمەن اينالىستى، اقشانى سىرتقا شىعاردى جانە سالىقتان جالتاردى دەگەن ايىپ تاعىلدى.
ارتىنشا OlimpKZ بۋكمەكەرلىك كەڭسەسىنىڭ بۋحگالتەرى چەرنوگوريادان ەكستراديتسيالاندى.
“ادىرنا” ۇلتتىق پورتالى
