ۇستالعان جانسەيىت بۇرحان 2 اي مەرزىمگە ۇيقاماققا الىندى، دەپ جازادى "ادىرنا" ۇلتتىق پورتالى. بۇل تۋرالى الماتى قالاسىنىڭ تەرگەۋ سوتى حابارلادى.
"الماتى قالاسى تەرگەۋ سوتىنىڭ 2022 جىلعى 17 شىلدەدەگى قاۋلىسىمەن جانسەيىت بۇرحان 2 اي مەرزىمگە 17 قىركۇيەككە دەيىن ۇيقاماققا الىندى، كۇزەتپەن ۇستاۋ تۇرىندەگى بۇلتارتپاۋ شاراسى سانكتسيالاۋدان باس تارتىلدى", - دەلىنگەن حابارلامادا.
سونىمەن قاتار رەسپۋبليكالىق ادۆوكاتتار القاسىندا بۇرحان جانسەيىتوۆتىڭ ادۆوكات ەمەس ەكەنىن مالىمدەدى.
"قارجى مونيتورينگى اگەنتتىگى ادۆوكات بۇرحان جانسەيىتوۆتى ۇستالعانى تۋرالى اقپارات باق-تا تاراتىلۋىنا بايلانىستى رەسپۋبليكالىق ادۆوكاتتار القاسى بۇل ادامنىڭ ادۆوكات ەمەس ەكەنىن حابارلايدى. ادۆوكاتتار ءوز جۇمىسىندا ەتيكا كودەكسىن باسشىلىققا الادى. وعان سايكەس كاسىبي قىزمەتتە ولار كاسىپتىڭ بەدەلىنە قامقورلىق جاساپ، مورال مەن زاڭنىڭ ۇستەمدىگى پرينتسيپتەرىن ورىندايدى. ءدال وسىنداي تالاپتار جوعارى زاڭگەرلىك ءبىلىمى بار كەز-كەلگەن ادامعا قاتىستى بولۋى كەرەك دەپ سانايمىز. بۇل رەتتە زاڭ كەڭەسشىسى بۇرحان جانسەيىتوۆكە قاتىستى تەرگەۋدى زاڭدىلىق قاعيداتىن قاتاڭ ساقتاي وتىرىپ جانە جاساعان ارەكەتىنە قۇقىقتىق باعا بەرە وتىرىپ تەرگەۋ تۇرگىزىلۋىن سۇرايمىز", - دەلىنگەن حابارلامادا.
ەستەرىڭىزگە سالا كەتەيىك، 15 شىلدە كۇنى قارجى مونيتورينگى اگەنتتىگى بۇرحان جانسەيىتوۆتىڭ الماتىدا قۇقىق قورعاۋ ورگاندارىنىڭ ۇيىمداسقان قىلمىستىق توپتاردى جويۋعا باعىتتالعان قىزمەتىنە كەدەرگى كەلتىرگەنى ءۇشىن ۇستالعانىن حابارلاعان بولاتىن.
"ادىرنا" ۇلتتىق پورتالى
