تۇركيانىڭ چاناككالە قالاسىندا ەۋروپا مەن ازيا مادەنيەتىنىڭ 5 مىڭ جىلدىق تاريحى بار مۇراعاتتارىن كوپشىلىك نازارىنا ۇسىناتىن ترويا مۋزەيى اشىلادى.
2018 جىل — ترويا جىلى
ەجەلگى قالا – ترويانىڭ UNESCO دۇنيەجۇزىلىك مۇرالار تىزىمىنە ەنگەنىنە 20 جىل تولۋىنا وراي، تۇركيا مەملەكەتىنىڭ مادەنيەت جانە تۋريزم مينيسترلىگى 2018 جىلدى «ترويا جىلى» دەپ جاريالادى. مينيسترلىكتىڭ تۇركيا مەن شەت مەملەكەتتەردە ۇيىمداستىرعان ءتۇرلى مادەني، تاريحي جانە ونەر سالاسىنا قاتىستى شارالارىنىڭ ناتيجەسىندە، «ترويا جىلى» اتالعان 2018 جىلدىڭ العاشقى 5 ايىندا چاناككالە قالاسىنا جەر شارىنىڭ نازارى اۋدى. ەجەلگى ءداۋىردىڭ اڭىزدارى سۋرەتتەلگەن ترويا مۋزەيى قوس قۇرلىقتىڭ وتكەنىنە تيەسىلى تاريحىنان سىر شەرتەدى. تۇركيا مەن الەمدىك قاۋىمداستىق ءۇشىن ماڭىزى زور وركەنيەتتىڭ قالاي دامىعانىن تاريحي مۇرالارمەن سويلەتەدى.
ارحەولوگيالىق قازبالاردىڭ ماڭىنا تۇرعىزىلعان ترويا مۋزەيىنىڭ اشىق كەڭىستىكتەگى جالپى كولەمى – 37 250 شارشى مەتر. ال نەگىزگى بولىگى – 12 765 شارشى مەتر. عيماراتتىڭ ۇزىندىعى انتيكالىق قالا – ترويانىڭ قازبا جۇمىستارى باستالماي تۇرعانداعى ۇزىندىعىمەن بىردەي. ارحيتەكتۋرالىق ديزاينى 150 جوبانىڭ ىشىنەن تاڭدالعان. الەمدەگى ەڭ ماڭىزدى ارحەولوگيالىق مۋزەي سانالاتىن بۇل نىساننىڭ سالتاناتتى اشىلۋى جۋىردا، ياعني، 2018 جىلدىڭ شىلدەسىندە بولادى. وعان حالىقارالىق قاۋىمداستىقتىڭ مادەنيەت، تاريح، تۋريزم، سپورت پەن ءباسپاسوز سالالارىنداعى ساڭلاقتار شاقىرىلادى.
مىڭجىلدىقتار سويلەيدى
ترويا مۋزەيىنىڭ جالپى كولەمى 3 مىڭ شارشى مەترگە تەڭ زالىنا ترويا مەن تروادا قالالارىنىڭ قازبا جۇمىستارىنان تابىلعان 2 مىڭنان استام سكۋلپتۋرالار، جازبالار، التارلار، مەتالل ىدىستار، التىن، مونەتالار، ساركوفاگتار ت.ب. جادىگەرلەرى قويىلادى. ادامزاتتىڭ دامۋ تاريحىنا كۋا بولعان بۇل مۇرالار اراسىندا ءبىر كەزدەرى تروياداعى قازبا جۇمىستارىنىڭ ناتيجەسىندە تابىلىپ، كەيىن ۇرلانعان، انىعى، امەريكا اسقان بىرنەشە قۇندى جادىگەرلەر بار. ولار تۇركيا مادەنيەت جانە تۋريزم مينيسترلىگىنىڭ كۇش سالۋىمەن، 2012 جىلى تۇرىكتەر ەلىنە قايتارىلعان ەكەن.
ۇيىمداستىرۋشىلاردىڭ ايتۋىنشا، ترويا مۋزەيىندە «تروادانىڭ ارحەولوگيالىق ايماعى»، «ترويانىڭ قولا عاسىرى»، «يليادا مەن ترويا ماڭىنداعى شايقاس تۋرالى اڭىز»، «ەجەلدەگى تروادا مەن يليون»، «شىعىس ريم يمپەرياسى جانە وسمان كەزەڭى»، «ارحەولوگيا تاريحى»، «ترويا ىزدەرى» دەگەن نەگىزگى 7 تاقىرىپ بار.
تۇركيا رەسپۋبليكاسىنىڭ قازاقستانداعى ەلشىلىگى مادەنيەت جانە اقپارات ىستەرى جونىندەگى كەڭەسشىسى نۋري شيمشەكلەر مىرزا: «ەجەلگى قالا – ترويانىڭ UNESCO دۇنيەجۇزىلىك مۇرالار تىزىمىنە ەنگەنىنە 20 جىل تولۋىنا وراي، تۇركيا مەملەكەتىنىڭ مادەنيەت جانە تۋريزم مينيسترلىگى 2018 جىلدى «ترويا جىلى» دەپ جاريالادى. ءبىزدىڭ بولجامىمىز بويىنشا، 2018 جىلى تۇركياعا 50 ميلليون تۋريست كەلەدى. ال ەجەلگى ترويا قالاسى مەن ترويا مۋزەيى ورنالاسقان چاناككالەگە ات باسىن بۇراتىن تۋريستەردىڭ سانى 50 ميلليوننان اسادى»، – دەپ مالىمدەدى.
ترويا قالاسى
گومەردىڭ «يليادا» مەن «وديسسەيا» پوەمالارىندا سۋرەتتەلگەن ترويا قالاسى تۇرىكتەردىڭ قازىرگى چاناككالە قالاسىنىڭ ماڭىندا ورنالاسقان. ونى ارحەولوگتار 1871 جىلى تاپقان. ءۇش مىڭ جىلدىق تاريحى بار ەجەلگى قالا 9 نەگىزگى مادەني دامۋ كەزەڭىن وتكەرگەن. ەگەي مەن بالقان تەڭىزدەرىنىڭ جاعالاۋىنا سوزىلعان ترويا ەجەلگى مادەنيەتتەردى قابىستىرادى. چاناككالەدەگى ترويا مۋزەيى سول مادەنيەتتەردىڭ ۇشقىنىن ادامزاتتىڭ بۇگىنگى ۇرپاعىنا سىيلايدى.
ءنازيا جويامەرگەن
