Túrkııanyń Chanakkale qalasynda Eýropa men Azııa mádenıetiniń 5 myń jyldyq tarıhy bar muraǵattaryn kópshilik nazaryna usynatyn Troıa mýzeıi ashylady.
2018 jyl — Troıa jyly
Ejelgi qala – Troıanyń UNESCO Dúnıejúzilik muralar tizimine engenine 20 jyl tolýyna oraı, Túrkııa memleketiniń Mádenıet jáne týrızm mınıstrligi 2018 jyldy «Troıa jyly» dep jarııalady. Mınıstrliktiń Túrkııa men shet memleketterde uıymdastyrǵan túrli mádenı, tarıhı jáne óner salasyna qatysty sharalarynyń nátıjesinde, «Troıa jyly» atalǵan 2018 jyldyń alǵashqy 5 aıynda Chanakkale qalasyna Jer sharynyń nazary aýdy. Ejelgi dáýirdiń ańyzdary sýrettelgen Troıa mýzeıi qos qurlyqtyń ótkenine tıesili tarıhynan syr shertedi. Túrkııa men álemdik qaýymdastyq úshin mańyzy zor órkenıettiń qalaı damyǵanyn tarıhı muralarmen sóıletedi.
Arheologııalyq qazbalardyń mańyna turǵyzylǵan Troıa mýzeıiniń ashyq keńistiktegi jalpy kólemi – 37 250 sharshy metr. Al negizgi bóligi – 12 765 sharshy metr. Ǵımarattyń uzyndyǵy antıkalyq qala – Troıanyń qazba jumystary bastalmaı turǵandaǵy uzyndyǵymen birdeı. Arhıtektýralyq dızaıny 150 jobanyń ishinen tańdalǵan. Álemdegi eń mańyzdy arheologııalyq mýzeı sanalatyn bul nysannyń saltanatty ashylýy jýyrda, ıaǵnı, 2018 jyldyń shildesinde bolady. Oǵan halyqaralyq qaýymdastyqtyń mádenıet, tarıh, týrızm, sport pen baspasóz salalaryndaǵy sańlaqtar shaqyrylady.
Myńjyldyqtar sóıleıdi
Troıa mýzeıiniń jalpy kólemi 3 myń sharshy metrge teń zalyna Troıa men Troada qalalarynyń qazba jumystarynan tabylǵan 2 myńnan astam skýlptýralar, jazbalar, altarlar, metall ydystar, altyn, monetalar, sarkofagtar t.b. jádigerleri qoıylady. Adamzattyń damý tarıhyna kýá bolǵan bul muralar arasynda bir kezderi Troıadaǵy qazba jumystarynyń nátıjesinde tabylyp, keıin urlanǵan, anyǵy, Amerıka asqan birneshe qundy jádigerler bar. Olar Túrkııa Mádenıet jáne týrızm mınıstrliginiń kúsh salýymen, 2012 jyly túrikter eline qaıtarylǵan eken.
Uıymdastyrýshylardyń aıtýynsha, Troıa mýzeıinde «Troadanyń arheologııalyq aımaǵy», «Troıanyń qola ǵasyry», «Ilıada men Troıa mańyndaǵy shaıqas týraly ańyz», «Ejeldegi Troada men Ilıon», «Shyǵys Rım ımperııasy jáne Osman kezeńi», «Arheologııa tarıhy», «Troıa izderi» degen negizgi 7 taqyryp bar.
Túrkııa Respýblıkasynyń Qazaqstandaǵy elshiligi Mádenıet jáne aqparat isteri jónindegi keńesshisi Nýrı Shımshekler myrza: «Ejelgi qala – Troıanyń UNESCO Dúnıejúzilik muralar tizimine engenine 20 jyl tolýyna oraı, Túrkııa memleketiniń Mádenıet jáne týrızm mınıstrligi 2018 jyldy «Troıa jyly» dep jarııalady. Bizdiń boljamymyz boıynsha, 2018 jyly Túrkııaǵa 50 mıllıon týrıst keledi. Al ejelgi Troıa qalasy men Troıa mýzeıi ornalasqan Chanakkalege at basyn buratyn týrısterdiń sany 50 mıllıonnan asady», – dep málimdedi.
Troıa qalasy
Gomerdiń «Ilıada» men «Odısseıa» poemalarynda sýrettelgen Troıa qalasy túrikterdiń qazirgi Chanakkale qalasynyń mańynda ornalasqan. Ony arheologtar 1871 jyly tapqan. Úsh myń jyldyq tarıhy bar ejelgi qala 9 negizgi mádenı damý kezeńin ótkergen. Egeı men Balqan teńizderiniń jaǵalaýyna sozylǵan Troıa ejelgi mádenıetterdi qabystyrady. Chanakkaledegi Troıa mýzeıi sol mádenıetterdiń ushqynyn adamzattyń búgingi urpaǵyna syılaıdy.
Názııa JOIaMERGEN
