تەڭىز كەن ورنىندا قازا تاپقان ەكى ازاماتتىڭ نەسيەلەرى جابىلادى

2389
Adyrna.kz Telegram

تەڭىز كەنىشىندەگى جارىلىستان قايتىس بولعان ەكى جۇمىسشىنىڭ نەسيەسى جابىلادى. بۇل تۋرالى «سەنىمدى قۇرىلىس» كومپانياسىنىڭ وندىرىستىك قاتىناستار جونىندەگى مەنەدجەرى گۇلميرا باتپانوۆا ءمالىم ەتتى.

«ەكى ارىپتەسىمىز قايتىس بولعان قايعىلى جاعداي بىزگە اۋىر ءتيدى. مارقۇمداردىڭ وتباسىنا قايعىرىپ كوڭىل ايتامىز. ءبىزدىڭ كومپانيادا مۇنداي وقىس وقيعا ءبىرىنشى رەت تىركەلىپ وتىر. قايتىس بولعان ەكى ارىپتەسىمىزدىڭ وتباسىنا بارلىق كومەكتى كورسەتەمىز. قازىر «تەڭىزشەۆرويل» جشس مەن وبلىستىق مەملەكەتتىك ەڭبەك ينسپەكتسياسى باسقارماسىنىڭ قىزمەتكەرلەرى كىرگەن بىرلەسكەن كوميسسيا قۇرىلدى. ءدال قازىر جارىلىسقا نە سەبەپ بولعانىن ايتا المايمىز. تەكسەرۋ كوميسسياسىنا قاجەتتى قۇجاتتاردىڭ ءبارىن بەردىك»، - دەپ حابارلادى گۇلميرا باتپانوۆا.

ونىڭ ايتۋىنشا، جارىلىستان قايتىس بولعان ەكى جۇمىسشىنىڭ دا جاسى 37-دە بولعان. «سەنىمدى قۇرىلىس» جشس ولاردىڭ وتباسىنا ماتەريالدىق كومەك كورسەتەدى.

«كومپانيا مارقۇمداردى سوڭعى ساپارعا شىعارىپ سالۋعا جۇمسالاتىن بارلىق ماتەريالدىق شىعىندى ءوز موينىنا الدى. سونىمەن قاتار، ولاردىڭ بارلىق قارىزدارى مەن نەسيەلەرىن جابۋ، بالالارىنىڭ وقۋ اقىسىن تولەۋ تۋرالى شەشىم قابىلداندى. بۇگىن قاجەتتى ءىرى قارا مال ساتىپ الۋعا 500 مىڭ تەڭگەدەن قارجى اپارىپ بەردىك. الداعى ۋاقىتتا بۇل وتباسىلارعا كومەكتەسۋدى مىندەتىمىزگە الامىز»، - دەدى گۇلميرا باتپانوۆا.

قازىر «سەنىمدى قۇرىلىس» جشس-ءنىڭ وندىرىستىك نىسانىنداعى جۇمىس ءىشىنارا توقتاتىلعان. جۇمىسشىلار ۇيىنە جىبەرىلگەن. قايعىلى وقيعا ۆاحتالىق اۋىسىمنىڭ اياقتالۋىنا ەكى كۇن قالعاندا بولعان.

ەسكە سالا كەتەلىك، بۇعان دەيىن تەڭىز كەن ورنىندا جارىلىس بولىپ، ەكى ادام قازا تاپقانىن، كەيىن زارداپ شەككەندەرگە ماتەريالدىق كومەك كورسەتىلەتىنىن جازعان ەدىك.

“ادىرنا” ۇلتتىق پورتالى 

پىكىرلەر