Teńiz ken ornynda qaza tapqan eki azamattyń nesıeleri jabylady

2390
Adyrna.kz Telegram

Teńiz kenishindegi jarylystan qaıtys bolǵan eki jumysshynyń nesıesi jabylady. Bul týraly «Senimdi qurylys» kompanııasynyń óndiristik qatynastar jónindegi menedjeri Gúlmıra Batpanova málim etti.

«Eki áriptesimiz qaıtys bolǵan qaıǵyly jaǵdaı bizge aýyr tıdi. Marqumdardyń otbasyna qaıǵyryp kóńil aıtamyz. Bizdiń kompanııada mundaı oqys oqıǵa birinshi ret tirkelip otyr. Qaıtys bolǵan eki áriptesimizdiń otbasyna barlyq kómekti kórsetemiz. Qazir «Teńizshevroıl» JShS men oblystyq memlekettik eńbek ınspekııasy basqarmasynyń qyzmetkerleri kirgen birlesken komıssııa quryldy. Dál qazir jarylysqa ne sebep bolǵanyn aıta almaımyz. Tekserý komıssııasyna qajetti qujattardyń bárin berdik», - dep habarlady Gúlmıra Batpanova.

Onyń aıtýynsha, jarylystan qaıtys bolǵan eki jumysshynyń da jasy 37-de bolǵan. «Senimdi qurylys» JShS olardyń otbasyna materıaldyq kómek kórsetedi.

«Kompanııa marqumdardy sońǵy saparǵa shyǵaryp salýǵa jumsalatyn barlyq materıaldyq shyǵyndy óz moınyna aldy. Sonymen qatar, olardyń barlyq qaryzdary men nesıelerin jabý, balalarynyń oqý aqysyn tóleý týraly sheshim qabyldandy. Búgin qajetti iri qara mal satyp alýǵa 500 myń teńgeden qarjy aparyp berdik. Aldaǵy ýaqytta bul otbasylarǵa kómektesýdi mindetimizge alamyz», - dedi Gúlmıra Batpanova.

Qazir «Senimdi qurylys» JShS-niń óndiristik nysanyndaǵy jumys ishinara toqtatylǵan. Jumysshylar úıine jiberilgen. Qaıǵyly oqıǵa vahtalyq aýysymnyń aıaqtalýyna eki kún qalǵanda bolǵan.

Eske sala ketelik, buǵan deıin Teńiz ken ornynda jarylys bolyp, eki adam qaza tapqanyn, keıin zardap shekkenderge materıaldyq kómek kórsetiletinin jazǵan edik.

“Adyrna” ulttyq portaly 

Pikirler