پاۆلودار وبلىسىندا جەكە ءۇيدىڭ اۋلاسىنان ەكى ادامنىڭ ءمايىتى تابىلدى. قايعىلى وقيعا تەرەڭكول اۋدانىنىڭ بەرەگوۆوە اۋىلىندا ورىن الدى، دەپ جازادى "ادىرنا" ۇلتتىق پورتالى.
وبلىستىق پوليتسيا دەپارتامەنتىنىڭ مالىمدەۋىنشە، وقيعا ورنىندا قاجەتتى تەرگەۋ امالدارى جۇرگىزىلىپ، ادام ءولتىردى دەگەن كۇدىكپەن 22 جاستاعى اۋىل تۇرعىنىنىڭ ۇستالعان.
"3 شىلدە كۇنى ساعات 02:10-دا تەرەڭكول اۋدانى، بەرەگوۆوە اۋىلىندا جەكە تۇرعىن ءۇيدىڭ اۋلاسىنان پىشاق جاراقاتى تۇرىندە زورلىق-زومبىلىق بەلگىلەرى بار 46 جاستاعى ءۇي يەسى مەن ونىڭ 48 جاستاعى بىرگە تۇراتىن ادامنىڭ مايىتتەرى تابىلدى. مارقۇمنىڭ كامەلەتكە تولماعان ۇلى ءۇي-جايلاردىڭ بىرىندە پانالاعاندىقتان زارداپ شەككەن جوق", – دەلىنگەن حابارلامادا.
Pavlodarnews.kz حابارلاۋىنشا، ادام قولىنان اجال قۇشقان ايەلدىڭ قىزى، 16 جاستاعى الينانىڭ ايتۋىنشا، بۇل قىلمىستى 3 شىلدەگە قاراعان ءتۇنى جەتى ايعا جۋىق جۇرگەن بۇرىنعى جىگىتى جاساعان.
بويجەتكەننىڭ ايتۋىنشا، بەرەگوۆوە اۋىلىندا بۇرىنعى سۇيىكتىسى بەتىن قايتارعان 22 جاستاعى جىگىت قىزدىڭ اناسى مەن وگەي اكەسىنە پىشاقپەن شابۋىل جاساعان. ەكەۋى بىرنەشە پىشاق جاراقاتىنان قايتىس بولدى. بويجەتكەن سول ءتۇنى پاۆلودارداعى تۋىستارىنىڭ ۇيىندە قونعاندىقتان ءتىرى قالعان.
– شامامەن ءبىر اي بۇرىن مەن ونىڭ ەسىرتكى قولداناتىنىن ءبىلدىم، سوندىقتان ونىمەن قارىم-قاتىناستى توقتاتۋدى شەشتىم. ول قارسى بولدى جانە مەنىڭ ءالى بۇل شەشىمىم ءۇشىن قاتتى وكىنەتىنىمدى ايتتى، - دەپ ەسكە الادى الينا. - 2 شىلدەدە مەن پاۆلوداردا بولدىم، كوللەدجگە ءتۇسۋ ءۇشىن قۇجاتتار تاپسىرۋعا دايىندالدىم. تۇندە تاتەم ماعان قوڭىراۋ شالىپ، شۇعىل تۇردە ورالۋىم كەرەك ەكەنىن ايتتى. ۇيدە انام مەن وگەي اكەمدى ءولتىرىپ كەتكەنىن ءبىلدىم.
قىزدىڭ سوزىنشە، تۋىستارى وعان وقيعانىڭ ءمان-جايىن ايتىپ بەرگەن.
- سول ءتۇنى انام، وگەي اكەم جانە مەنىڭ 13 جاسار باۋىرىم ۇيدە بولدى. ولار تۇنگى ساعات بىرگە قاراي وتشاشۋدى ەستىپ، كوشەگە شىققان. باۋىرىم بارعىسى كەلمەدى جانە ۇيدە قالدى. ءبىراز ۋاقىتتان كەيىن انام ۇيگە جۇگىرىپ كەلىپ، وعان جاسىرىن دەپ ايتقان. باۋىرىمدى قۇتقارۋعا تىرىسىپ، كومەك سۇراپ جۇگىرگەن. ول اللەياعا جەتكەن كەزدە بۇرىنعى جىگىتىم ونى قۋىپ جەتكەن. انام پىشاق جاراقاتىنان قايتىس بولدى. بۇعان دەيىن ول انامدى قورعاۋعا تىرىسقان وگەي اكەمدى دە ولتىرگەن، - دەدى الينا.
بويجەتكەن كۇدىكتى ۇستالعانىمەن جازادان قۇتىلىپ كەتە مە دەپ قورقادى.
- بۇگىن ونىڭ اناسى كەلىپ، كومەك رەتىندە اقشا اكەلدى. ول جىلاپ، ۇلىنىڭ اۋىرعانىن ايتتى. بالكىم، بۇل ەسىرتكىنىڭ اسەرى بولۋى مۇمكىن، بىراق بۇل قاتىگەزدىكپەن كىسى ءولتىرۋدى اقتامايدى. انامنىڭ بۇكىل دەنەسىندە پىشاق جارالارى بار. ءبىز باۋىرىمىزبەن جالعىز قالدىق، باي تۋىستارىمىز بەن تانىستارىمىز جوق. ەرتەڭ انام مەن وگەي اكەمدى ولتىرگەن ادام بوستاندىققا شىعىپ، ءبىزدى دە امان قالدىرمايدى دەپ قورقامىن، - دەدى قىز.
ول بۇل ءىستى نازاردان تىس قالدىرماۋدى سۇرايدى.
"ادىرنا" ۇلتتىق پورتالى
