وزبەكستان پرەزيدەنتى شاۆكات ميرزيوەۆ تارتىپسىزدىكتەر ورىن العان نۇكىس قالاسىنا بارىپ، قاراقالپاقستان جوعارعى كەڭەس دەپۋتاتتارىمەن كەزدەستى، دەپ حابارلايدى "ادىرنا" دەرەككوزگە سىلتەپ.
پارلامەنت دەپۋتاتتارى جانە قاراقالپاقستان حالقىنىڭ الدىندا ءسوز سويلەگەن پرەزيدەنت كونستيتۋتسيالىق زاڭ جوباسى جالپىحالىقتىق تالقىلاۋدان ءوتىپ، كەيىن ودان ءارى جەتىلدىرۋ ءۇشىن زاڭ شىعارۋشى ورگانعا وتەتىنىن ايتتى. تەك وسىدان كەيىن عانا جوبا رەسپۋبليكالىق رەفەرەندۋمعا شىعارىلىپ، بۇل ساۋالعا قاتىستى حالىقتىڭ ەركىن داۋىس بەرەتىنىن مالىمدەدى.
«وسىدان سوڭ وزبەكستان رەسپۋبليكاسىنىڭ كونستيتۋتسياسىنا وزگەرىستەر مەن تولىقتىرۋلار ەنگىزىلەدى»، – دەپ اتاپ ءوتتى ميرزيوەۆ.
ونىڭ سوزىنشە، ەل حالقىنىڭ پارىزى – بىرلىك پەن بەيبىتشىلىكتى، تۇراقتىلىقتى ساقتاۋ.
«كونستيتۋتسيالىق رەفورمانىڭ باستى ماقساتى – وسى. ءبىز بىرگە مىندەتتى تۇردە جاڭا وزبەكستان مەن جاڭا قاراقالپاقستاندى قۇرامىز. وسى باعىتتاعى بارلىق رەفورمالار مەن تالقىلاۋلار تەك دەموكراتيالىق جولمەن ىسكە اسۋى كەرەك»، – دەپ قوستى ول.
سونداي-اق وزبەكستان پرەزيدەنتى قاراقالپاقستان رەسپۋبليكاسىنىڭ قۇقىقتىق مارتەبەسى وزگەرىسسىز قالۋى كەرەك دەپ سانايتىنىن ايتتى.
