جەتىسۋ وبلىسىنىڭ اكىمى بەيبىت يساباەۆ تالدىقورعانداعى ارداگەرلەر ۇيىندە بولىپ، اقساقالدارمەن كەزدەستى. ءوڭىردى دامىتۋدىڭ الداعى ماقسات-مىندەتتەرى جايلى اڭگىمەلەسىپ، پىكىر الماستى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
ول الدىمەن جاڭا قۇرىلىپ جاتقان وبلىستى وركەندەتۋ باعىتىندا پرەزيدەنتتىڭ جۇكتەگەن تاپسىرمالارى توڭىرەگىندە وي ءوربىتتى. سول ماقساتتارعا قول جەتكىزۋ ءۇشىن مەجەلەنىپ وتىرعان جۇيەلى جوسپارلارىنا دا قىسقاشا توقتالدى. سونىمەن بىرگە جاڭا ساياسي وزگەرىستەرگە ساي حالىقپەن پىكىرلەسىپ، ارداگەرلەرمەن اقىلداسا وتىرىپ جۇمىس ىستەۋدىڭ ماڭىزدىلىعىن اتاپ ءوتتى.
- جەتىسۋ ولكەسىنەن نۇرمولدا الدابەرگەنوۆ، زىليحا تامشىباەۆا، نيكولاي گولوۆاتسكي، نۇرلان وڭالدينوۆ، تىنىباي بالتاباەۆ، زاكاريا سەيىتوۆا، كۇمىسبەك بۋاشەۆ، كۇلاش ايتجانوۆالارداي داڭقتى ەڭبەك ەرلەرى شىققان. ءبىز ەڭبەك ادامىنىڭ بيىك تۇلعاسىن قالىپتاستىرماي، وسى اتالعان ەڭبەك ەرلەرىن دارىپتەمەي، قازىرگى جاستاردى ىزگىلىككە باۋلي المايمىز. وسكەلەڭ ۇرپاقتى ەڭبەكقورلىققا تاربيەلەۋ – ورتاق پارىزىمىز، - دەگەن ب.يساباەۆ جاستار تاربيەسىندەگى، قوعامدىق قۇندىلىقتاردى قالىپتاستىرۋداعى ارداگەرلەردىڭ رولىنە توقتالدى. جانە وسى جولدا بىرلەسىپ ەڭبەك ەتۋگە، ارداگەرلەردىڭ اقىل-كەڭەستەرىن، ۇسىنىس-تىلەكتەرىن تىڭداۋعا ءازىر ەكەنىن جەتكىزدى.
ەڭبەك ارداگەرلەرى ەرمەك كەلەمسەيىت، ناۋرىز قىلىشباەۆ، قادىل جاناسبەكوۆ جانە باسقا دا ازاماتتار ءوز سوزدەرىندە جاڭا وبلىستىڭ ىرگەسىن نىعايتۋعا قولىنان كەلگەن كومەگىن جاسايتىندىقتارىن ايتتى. بىرقاتار اۋدانداردا مەكتەپتەردى جوندەۋ، تۇرعىن ءۇي قۇرىلىسىنا جەر ءبولۋ، قۇرىلىسقا قارقىن قوسۋ سياقتى وزەكتى ماسەلەلەر بار ەكەنىن مىسال ەتتى. ويلارىن «بىرەۋدىڭ بويلاپ وسكەنىنەن كوپشىلىكتىڭ قاۋلاپ وسكەنى جاقسى» دەگەن قاناتتى سوزبەن تۇيىندەپ، وبلىس باسشىسىنىڭ ەلدىڭ تۇرمىس جاعدايىن كوتەرۋدەگى جوسپار-جوبالارىنىڭ، باعىت-باستامالارىنىڭ جەمىستى بولۋىنا تىلەكتەستىگىن ءبىلدىردى.
