Jetisý oblysynyń ákimi ardagerlermen kezdesip, óńirdi damytý mindetterin talqylady

2400
Adyrna.kz Telegram
www.gov.kz
www.gov.kz

Jetisý oblysynyń ákimi Beıbit Isabaev Taldyqorǵandaǵy Ardagerler úıinde bolyp, aqsaqaldarmen kezdesti. Óńirdi damytýdyń aldaǵy maqsat-mindetteri jaıly áńgimelesip, pikir almasty, - dep habarlaıdy Jetisý oblysy ákiminiń baspasóz qyzmeti.

Ol aldymen jańa qurylyp jatqan oblysty órkendetý baǵytynda Prezıdenttiń júktegen tapsyrmalary tóńireginde oı órbitti. Sol maqsattarǵa qol jetkizý úshin mejelenip otyrǵan júıeli josparlaryna da qysqasha toqtaldy. Sonymen birge jańa saıası ózgeristerge saı halyqpen pikirlesip, ardagerlermen aqyldasa otyryp jumys isteýdiń mańyzdylyǵyn atap ótti.

- Jetisý ólkesinen Nurmolda Aldabergenov, Zylıha Tamshybaeva, Nıkolaı  Golovakıı, Nurlan Ońaldınov, Tynybaı Baltabaev, Zakarııa Seıitova, Kúmisbek Býashev, Kúlásh Aıtjanovalardaı dańqty Eńbek Erleri shyqqan. Biz eńbek adamynyń bıik tulǵasyn qalyptastyrmaı, osy atalǵan Eńbek Erlerin dáriptemeı, qazirgi jastardy izgilikke baýlı almaımyz. Óskeleń urpaqty eńbekqorlyqqa tárbıeleý – ortaq paryzymyz, - degen B.Isabaev jastar tárbıesindegi, qoǵamdyq qundylyqtardy qalyptastyrýdaǵy ardagerlerdiń róline toqtaldy. Jáne osy jolda birlesip eńbek etýge, ardagerlerdiń aqyl-keńesterin, usynys-tilekterin tyńdaýǵa ázir ekenin jetkizdi.

Eńbek ardagerleri Ermek Kelemseıit, Naýryz Qylyshbaev, Qadyl Janasbekov jáne basqa da azamattar óz sózderinde jańa oblystyń irgesin nyǵaıtýǵa qolynan kelgen kómegin jasaıtyndyqtaryn aıtty. Birqatar aýdandarda mektepterdi jóndeý, turǵyn úı qurylysyna jer bólý, qurylysqa qarqyn qosý sııaqty ózekti máseleler bar ekenin mysal etti. Oılaryn «Bireýdiń boılap óskeninen kópshiliktiń qaýlap óskeni jaqsy» degen qanatty sózben túıindep, oblys basshysynyń eldiń turmys jaǵdaıyn kóterýdegi jospar-jobalarynyń, baǵyt-bastamalarynyń jemisti bolýyna tilektestigin bildirdi.

Pikirler