بۇگىن وبلىس اكىمى عالي ەسقاليەۆ توراعالىعىمەن «ەل بىرلىگى – جاڭارعان قازاقستاننىڭ تىرەگى» تاقىرىبىندا باتىس قازاقستان وبلىسى قازاقستان حالقى اسسامبلەياسىنىڭ XXIV سەسسياسى ءوتتى.
سەسسيا جۇمىسىنا وڭىردەگى ەتنومادەني بىرلەستىكتەر، وبلىستىق اسسامبلەيانىڭ قۇرىلىمدىلىق بولىمشەلەرى، قوعامدىق كەلىسىم، اقساقالدار جانە انالار كەڭەستەرى، مەملەكەتتىك ورگاندار، بيزنەس وكىلدەرى، جاستار قوزعالىسى مەن ەرىكتىلەر جانە بۇقارالىق اقپارات قۇرالدارىنىڭ وكىلدەرى قاتىستى.
وبلىس اكىمى ءوزىنىڭ سوزىندە وبلىستىق اسسامبلەيا مۇشەلەرىنىڭ نازارىن مەملەكەت باسشىسى ق.ك.توقاەۆ بەلگىلەگەن باسىم مىندەتتەردى ورىنداۋعا اۋداردى، بۇل - قحاا مۇشەلەرىن، وبلىستىق اسسامبلەيانىڭ قوعامدىق قۇرىلىمدارىن ساياسي رەفورمالاردى ىسكە اسىرۋعا بەلسەندى قوسۋ، قازاقستاندىق پاتريوتيزم، ازاماتتىق تەڭقۇقىقتىق قاعيداتتارىن، مەملەكەتتىك ءتىلدىڭ بىرىكتىرۋشى ءرولىن، الۋان تۇرلىلىكتەگى بىرلىكتى ىلگەرىلەتۋ جانە اقپاراتتىق جۇمىستى كۇشەيتۋ.
كۇن ءتارتىبى بويىنشا العاشقى ءسوز العان وبلىستىق «ورال ءوڭىرى» گازەتىنىڭ باس رەداكتورى، بقو قحا جۋرناليستەر كلۋبىنىڭ مۇشەسى ب.عۇبايدۋللين ۇلىتاۋداعى ۇلتتىق قۇرىلتايدىڭ قاتىسۋشىسى رەتىندە ەل دامۋىنىڭ تاريحي كەزەڭى، جالپىۇلتتىق بىرلىكتى نىعايتۋ جونىندە كەلەلى ويلارىن ورتاعا سالىپ، ماسىلدىق پيعىلمەن كۇرەسۋ، وتباسىلىق قۇندىلىقتاردى دارىپتەۋ تۋراسىندا پىكىرىن جەتكىزدى.
«بقو ورىس مادەني ورتالىعى» قوعامدىق بىرلەستىگىنىڭ توراعاسى س.بىكوۆ ەلورداسىندا وتكەن قازاقستان حالقى اسسامبلەياسىنىڭ ءحححى سەسسياسىنان العان اسەرىن اڭگىمەلەپ، وڭىردەگى ازاماتتىق بىرلىكتى مادەنيەت پەن ونەر ارقىلى نىعايتۋ بويىنشا جۇرگىزۋ قاجەتتىگىن اتاپ كورسەتتى.
بقو قحا «ەدناننيا» ۋكراين ەتنومادەني بىرلەستىگى بەلسەندى مۇشەسى م.بروديانوي بۇگىنگى كۇندە الەمدە جاڭا سىن-قاتەرلەردىڭ تۋىنداۋىنا ىقپال ەتەتىن گەوساياسي احۋالدىڭ ۋشىعىپ تۇرعان ۋاقىتىندا، ەلىمىزدىڭ ازاماتتىق بىرەگەيلىگىن نىعايتىپ، وتانشىلدىق رۋحتى كوتەرۋگە باسا ءمان بەرۋ كەرەكتىگىن باسا ايتتى. ونىڭ «بەيبىتشىلىك پەن تۇراقتىلىقسىز بولاشاعىمىز بۇلىڭعىر، ءبىزدىڭ قازاقستاننان باسقا وتانىمىز جوق جانە بولمايدى دا»، - دەگەن ءسوزى سەسسيا قاتىسۋشىلارىنىڭ قىزۋ قولداۋىنا يە بولدى.
سونىمەن قاتار، جيىن بارىسىندا وبلىستىق قازاقستان حالقى اسسامبلەياسى توراعاسىنىڭ ورىنباسارى، «ۆايناح» شەشەن-ينگۋش ەتنومادەني بىرلەستىگىنىڭ توراعاسى د.ساراتوۆ قازاقستانداعى ەتنوسارالىق كەلىسىم قاعيداتىنىڭ دامۋى، بقو قحا كاسىپكەرلەر قاۋىمداستىعىنىڭ توراعاسى ب.سارسەنوۆ قازاقستان مەن رەسەيدىڭ شەكارالاس اۋماقتارىنداعى ساۋدا-ەكونوميكالىق قاتىناستارىنىڭ پەرسپەكتيۆالارى جونىندە باياندادى.
سەسسيا جۇمىسى ودان ءارى جينالعانداردىڭ پىكىر الماسۋىنا ۇلاسىپ، وڭىردەگى الەۋمەتتىك ماسەلەلەر، جاستار باستامالارىن دامىتۋ سىندى ۇسىنىستار تالقىلاندى.
سەسسيا جۇمىسىن قورىتىندىلاعان ءوڭىر باسشىسى عالي ەسقاليەۆ وبلىستىق قازاقستان حالقى اسسامبلەياسى قىزمەتىنىڭ وڭ ديناميكاسىن اتاپ ءوتىپ، وڭىرلىك قحا قىزمەتىن قايتا فورماتتاۋ، اسسامبلەيا جۇمىسىن مەملەكەت پەن قوعام اراسىندا سىندارلى ديالوگ قۇرۋعا، ازاماتتاردىڭ قۇقىقتارى مەن مۇددەلەرىن قورعاۋعا باعىتتالعان ناقتى ىستەرمەن تولىقتىرۋ ارقىلى جۇرگىزۋدى ۇسىندى.
