جەردىڭ ءىس قۇجاتتارى تۇركىستان وبلىستىق پوليتسيا دەپارتامەنتىنىڭ باستىعى گەنەرال-مايور مۇرات قابدەنوۆكە جەتكەندە، 15547,75 گەكتار جەر اۋداننىڭ قورىنا ءوتتى دەگەن بۇيرىق كەلىپ تۇر...
ءبىز جاقتا نە بولىپ جاتىر!؟
قازىعۇرت اۋدانى، التىنتوبە اۋىلى وكرۋگىنىڭ 10000-عا جۋىق حالقىنىڭ ىشىنەن شىققان بەلسەندى باستاماشى توبىنداعى 35 جىگىت 10 اي بويى جەر ءۇشىن بارىن سالىپ كۇرەس جۇرگىزدى. حالىقتى ۇيىمداستىردى، حالىققا ءتۇسىندىرۋ جۇمىستارىن جۇرگىزۋدەن جالىقپادى.
وسى ءىستىڭ باسى قاسىندا جۇرگەندىكتەن ماعان قولىنان كەلگەن كومەكتىڭ بارلىعىن كورسەتتى. جۇرەر جولىمدى دا، كەرەك جاراعىمنىڭ ءبارىن وسى جىگىتتەر تاۋىپ بەرىپ وتىردى.
ءبىز التىنتوبە اۋىلى وكرۋگىنىڭ 17000 گەكتارعا جۋىق جەر تەلىمدەرىن حالىقتىڭ يگىلىگىنە قايتارۋ ءۇشىن 3 رەت قازىعۇرت اۋداندىق سوتىنا تالاپ-ارىز تۇسىردىك. سوت ءبىزدىڭ تالاپ-ارىزىمىزدىڭ ۇشەۋىن دە قايتارىپ تاستادى.
سودان كەيىن ءبىزدىڭ سوتتىڭ ۇيعارىمدارىنا بەرگەن اپەللياتسيالىق شاعىمدارىمىز وبلىستىق سوت پەن جوعارى سوتتىڭ كەڭسەلەرىن جاعالاپ كەتتى. جىلعا جۋىق ۋاقىتىمىز وسىنداي ارپالىستارعا جۇمسالىپ، قالتامىزدان كوپ شىعىندالدىق. 10 اي ۋاقىتىمىز وبلىس پەن اۋداننىڭ اراسىنداعى جولدا ءوتتى.
سودان كوپ ۇزاماي، بەلگىلى جۋرناليست، «ادىلەت-سارىاعاش» قوعامدىق بىرلەستىگىنىڭ توراعاسى امانگەلدى امانگەلدى باتىربەكوۆ اعامىز مەنىڭ فەيسبۋككە جەر داۋلارى بويىنشا شىققان ماقالامدى كورىپ، «بەكبولات، سەن تەز ارادا ماعان كەلىپ كەتشى» دەدى. اراعا ۋاقىت سالعان جوقپىن. تاز ارادا ساگاديللا دانياروۆ اعامدى الىپ، كولىككە بەنزيندى قۇيىپ، امانگەلدى اعامىزعا جەتىپ كەلدىك.
سودان امانگەلدى اعامىز: «بەكبولات، سەن نە ىستەپ ءجۇرسىڭ؟ مىناۋ جاقتا قانداي وزگەرىستەر بولىپ جاتقانىنان حابارىڭ بار ما؟»-دەپ، ماعان بۇرىنعى وبلىستىق جەر ينسپەكتسيالارىنىڭ ءبارى رەسپۋبليكا بويىنشا «جەر رەسۋرستارىن رەتتەۋ دەپارتامەنتتەرى» بولىپ وزگەرتىلىپ، تىكەلەي قر اۋىلشارۋاشىلىعى جانىنداعى جەر رەسۋرستارىن رەتتەۋ كوميتەتىنە قاراستى بولىپ، تاۋەلسىز قۇزىرلى ورگان بولىپ قالىپتاسقانىن، بۇدان كەيىن وبلىستىق اكىمشىلىكتەرگە باعىنبايتىنىن، اكىمشىلىكتەرگە جالتاقتايتىن ءداۋىردىڭ اياقتالعانىن جەتكىزگەندە، توبە كوككە جەتتى.
سودان تەز ارادا شۇعىل ارەكەتتەرگە كوشىپ، تاپجىلماي وتىرىپ جەردىڭ بارلىق قۇجاتتارىن ءۇش كۇن بويى اقتارىپ، باسىنان اياعىنا دەيىن قايتا جازىپ، راسىمدەپ، دايىنداپ قويعان تۇستا، امانگەلدى اعام «قازىعۇرتتاعى جەر داۋى قىلمىسقا ۇلاستى» دەگەن فەيسبۋكتەگى ماقالامدى «س-ينفورم» رەسپۋبليكالىق اقپاراتتىق باسىلىمىنا شىعارىپ، قازىعۇرت اۋداندىق پروكۋراتۋراسىنا جولداپ، اۋداننىڭ پروكۋرورى قانات بازارباەۆتىڭ قابىلداۋىن سۇراپ، ۇلگەرىپ تاستاپتى.
12.05.2022 كۇنى امانگەلدى باتىربەكوۆ، ساعاديللا دانياروۆ اعالارىممەن كەلىپ، قازىعۇرت اۋدانىنىڭ پروكۋرورى قانات بازارباەۆتىڭ قابىلداۋىندا بولىپ، 2010 جىلى قازىعۇرت اۋدانىنىڭ اكىمى ت.اليەۆتىڭ زاڭسىز №153 قاۋلى شىعارىپ، اكىمدىك قىزمەتكەرلەرىنىڭ قىلمىستىق جولمەن قۇجاتتار راسىمدەپ، جەردى حالىققا بەلگىسىز كورپوراتسياعا وتكىزگەنىن، نەبارى 9 جىلدىڭ ىشىندە جەرلەر 4 بەلگىسىز مەكەمەگە ءوتىپ، جەمقورلاردىڭ پايدالانىپ وتىرعانىن جەتكىزىپ، ال اكىمدىك شىعاران №153 قاۋلىنىڭ وبلىستىق ارحيۆتەردەن تابىلماي، قۇجاتتاردى بەلگىسىز جولمەن جويىپ جىبەرگەنىن، وسىعان قاتىستى تىكەلەي قىلمىستىق ءىس قوزعاۋىن سۇرادىق.
پروكۋرورعا بەرگەن ارىزعا 18 قۇجاتتى تىركەپ وتكىزىپ، تالونىن الىپ قايتىپ كەتتىك.
سودان نە كەرەك، پروكۋرور قانات بازارباەۆ بارى-جوعى ەكى كۇننىڭ ىشىندە ىسپەن تانىسىپ، زەرتتەپ، «قر اكىمشىلىك پروتسەستىك-راسىمدىك كودەكسىندەگى» كورسەتىلگەن سوڭعى مەرزىمگە قاراماستان تۇركىستان وبلىستىق جەر رەسۋرستارىن رەتتەۋ دەپارتامەنتى مەن سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ سارىاعاش ايماعى بويىنشا اۋدانارالىق باسقارماسىنىڭ باسشىسى ە.ب.اسانوۆقا جولداپ جىبەردى.
ۋاقىتتى بوس وتكىزبەي، مەن امانگەلدى باتىربەكوۆ پەن ساعاديللا دانياروۆ اعالارىمدى ەرتىپ، تەز ارادا تۇركىستان وبلىستىق جەر رەسۋرستارىن رەتتەۋ دەپارتامەنتىنىڭ باستىعى قانات مىلتىقبەكوۆكە كەلىپ، قابىلداۋىندا بولىپ، جاعدايدىڭ بارلىعىن تۇسىندىردىك.
دەپارتامەنتتەگى ماماندارعا جاعدايدى ەگجەي-تەگجەيلى ءتۇسىندىرىپ، جۇمىس جاسادىق. جەر رەسۋرستارىن رەتتەۋ دەپارتامەنتىندەگى ماماندارمەن امانگەلدى اعام حابارلاسىپ، ۋاقىت وتكىزبەي، جاعدايدى سۋىتپاي ءبىلىپ وتىردى.
قانات مىلتىقبەكوۆ مىرزا تەز ارادا قول استىنداعى ماماندارعا تاپسىرما بەرىپ، قۇجاتتاردى زەردەلەپ، 2010 جىلى قازىعۇرت اۋدانىنىڭ اكىمى ت.اليەۆتىڭ زاڭسىز شىعارعان №153 قاۋلىسى وبلىستىق ارحيۆتەردەن تابىلماعانى تۋرالى قورىتىندىنى قولىمىزعا بەرىپ، ءىستى وبلىستىق پوليتسيا دەپارتامەنتىنە جولداعانىن جەتكىزدى.
قىزىقتىڭ كوكەسى سوندا بولدى. ءىس-قۇجاتتارى 31.05.2022 كۇنى وبلىستىق پوليتسيا دەپارتامەنتىنىڭ باستىعى گەنەرال-مايور مۇرات قابدەنوۆكە جەتكەن سوڭ، 31.05.2022 كۇنى كەشكى ۋاقىتتا تۇركىستان وبلىستىق اۋىلشارۋاشىلىعى باسقارماسى تاراپىنان № 70-ن/ق بۇيرىعىمەن التىنتوبە اۋىلى وكرۋگىنىڭ 15547,75 گەكتار جەر تەلىمدەرى قازىعۇرت اۋدانىنىڭ جەر قورىنا ءوتتى دەپ حابار كەلىپ تۇر.
ءبىزدىڭ قولىمىزدا قۇجاتتارى تۇر.
سودان ءبىز تۇركىستان وبلىستىق پوليتسيا باسقارماسىنىڭ باستىعى گەنەرال-مايور مۇرات كابدەنوۆتىڭ قابىلداۋىنا كىرىپ، جەرگە قاتىستى ءىستىڭ ءمان-جايىن ايتىپ، قىلمىستىق ءىس قوزعاۋىن، پروتسەسسۋالدى شەشىمدەر قابىلداۋىن سۇرادىق.
سەبەبى، مۇنىڭ استارىندا سىبايلاس جەمقورلىققا ابدەن باتقان، اكىمشىلىك قىزمەتكەرلەرى تاراپىنان قىلمىستىق جولمەن قۇجاتتار راسىمدەلىپ، حالىقتىڭ نەسىبەسىن ۇزاق جىلدار بويى جىمقىرىپ كەلگەن ارەكەتتەر بارى تايعا تاڭبا باسقانداي كورىنىپ تۇر.
گەنەرال-مايور مۇرات قابدەنوۆ مىرزا بىزگە ءبىر جاۋابىن ايتامىز دەدى.
بەكبولات قارجاە
