جامبىل وبلىسىندا توتەنشە جاعدايدى ەنگىزۋ تۋرالى قازاقستان رەسپۋبليكاسى پرەزيدەنتىنىڭ جارلىعىن جامبىل وبلىسىنىڭ مامانداندىرىلعان اۋدانارالىق اكىمشىلىك سوتىنىڭ سۋدياسى ەلەنا رومانەنكو مويىنداماعان، دەپ حابارلايدى "ادىرنا" ۇلتتىق پورتالى.
بۇل تۋرالى جۋرناليست ماديار ەرالىۇلى ءوزىنىڭ فەيسبۋك پاراقشاسىندا جازدى.
ونىڭ ايتۋىنشا، قاندى قاڭتار ۋاقىتىندا پرەزيدەنت جارلىعىمەن ەلىمىزدىڭ، ونىڭ ىشىندە جامبىل وبلىسى تۇرعىندارىنىڭ قاۋىپسىزدىگىن قامتاماسىز ەتۋ ماقساتىندا توتەنشە جاعداي ەنگىزىلىپ، قالادا ءجۇرىپ-تۇرۋ ەركىندىگىنە ۋاقىتشا شەكتەۋلەر بەلگىلەنگەن. اتالعان جارلىققا سۇيەنە وتىرىپ مادەنيەت جانە سپورت مينيسترلىگى ءوزىنىڭ رەسمي سايتىندا توتەنشە جاعداي رەجيمى كەزىندە مادەني-كوپشىلىك شارالار مەن شىعارماشىلىق ۇيىرمەلەر جۇمىسى توقتاتىلعانى جايىندا حابارلاما جاساعان. وسى حابارلامانىڭ نەگىزىندە جامبىل وبلىسى اكىمدىگىنىڭ مادەنيەت، ارحيۆتەر جانە قۇجاتتاما باسقارماسى مەملەكەت قارجىسىنىڭ ەسەبىنەن تەگىن شىعارماشىلىق ۇيىرمەلەر بويىنشا قىزمەتتەر ۇسىناتىن ءونىم بەرۋشىلەرىن ەسكەرتىپ، شىعارماشىلىق ۇيىرمە قىزمەتىن ۋاقىتشا توقتاتۋ بويىنشا ۇسىنىس جاساعان.
"الايدا بالالار مەن جاسوسپىرىمدەرگە ارنالعان «ۇلتتىق (حالىقتىق) بيلەر» ۇيىرمەسى بويىنشا مەملەكەت قارجىسى ەسەبىنەن تەگىن قىزمەت ۇسىناتىن دارا كاسىپكەر «ينفينيتي» ءوز قىزمەتكەرلەرى مەن بالالار ءومىرىن، دەنساۋلىعىن قاۋىپكە تىگىپ جۇمىسىن جالعاستىرا بەرگەن. ءدال وسى دارا كاسىپكەر «ينفينيتي» قاڭتار ايىنىڭ سوڭىندا مادەنيەت باسقارماسىنا توتەنشە جاعداي رەجيمى ۋاقىتىندا وتكىزگەن ساباقتارىنا قارجى تولەۋدى سۇراپ ەلەكتروندى ەسەبىن جولداعان. جوعارىدا ايتىلعان پرەزيدەنت جارلىعىن ەسكەرگەن مادەنيەت باسقارماسى دارا كاسىپكەر «ينفينيتيگە» توتەنشە جاعداي رەجيمىندە وتكىزگەن ساباقتارىنىڭ زاڭسىز ەكەنىن جانە قارجىنى تولىقتاي تولەمەۋگە ءماجبۇر ەكەنىن ەسكەرتىپ، نورماتيۆكە بايلانىستى توتەنشە جاعداي رەجيمى كەزىندەگى دارا كاسىپكەردىڭ عيماراتىن جانە مۇلكىن اعىمداعى قامتاماسىز ەتۋگە ارنالعان شىعىندارىن (جىلۋ مەن جارىعىنا جانە ت.ب. جۇمسالعان شىعىندارىن) تولەپ بەرەتىنىن جەتكىزگەن. دارا كاسىپكەر «ينفينيتي» مادەنيەت باسقارماسىنىڭ بۇل ەسكەرتۋلەرىنە قاناعاتتانباي سوتقا شاعىمدانعان. ءۇش ايعا جۋىق ۋاقىتقا سوزىلعان سوت ءىسىنىڭ اقىرىندا سۋديا رومانەنكو ەلەنا ۆلاديميروۆنا پرەزيدەنت جارلىعىن مويىنداماي، توتەنشە جاعداي رەجيمىندە وتكىزىلگەن ساباقتاردى زاڭدى دەپ شەشىم شىعاردى", — دەپ جازدى جۋرناليست.
ماديار ەرالىۇلى پرەزيدەنت جارلىعىن اكىمشىلىك سوت سۋدياسى مويىندامايتىن ەلدە مەملەكەتتىك قىزمەتشىلەر مەن قوعامنىڭ اراسىندا الاۋىزدىق كوبەيەتىندىگىن جەتكىزىپ، الاڭداۋشىلىق ءبىلدىردى.
"ادىرنا" ۇلتتىق پورتالى.
