Jambyl oblysynda tótenshe jaǵdaıdy engizý týraly Qazaqstan Respýblıkasy Prezıdentiniń Jarlyǵyn Jambyl oblysynyń mamandandyrylǵan aýdanaralyq ákimshilik sotynyń sýdıasy Elena Romanenko moıyndamaǵan, dep habarlaıdy "Adyrna" ulttyq portaly.
Bul týraly jýrnalıst Madııar Eralyuly óziniń feısbýk paraqshasynda jazdy.
Onyń aıtýynsha, qandy qańtar ýaqytynda Prezıdent Jarlyǵymen elimizdiń, onyń ishinde Jambyl oblysy turǵyndarynyń qaýipsizdigin qamtamasyz etý maqsatynda tótenshe jaǵdaı engizilip, qalada júrip-turý erkindigine ýaqytsha shekteýler belgilengen. Atalǵan Jarlyqqa súıene otyryp Mádenıet jáne sport mınıstrligi óziniń resmı saıtynda tótenshe jaǵdaı rejımi kezinde mádenı-kópshilik sharalar men shyǵarmashylyq úıirmeler jumysy toqtatylǵany jaıynda habarlama jasaǵan. Osy habarlamanyń negizinde Jambyl oblysy ákimdiginiń mádenıet, arhıvter jáne qujattama basqarmasy memleket qarjysynyń esebinen tegin shyǵarmashylyq úıirmeler boıynsha qyzmetter usynatyn ónim berýshilerin eskertip, shyǵarmashylyq úıirme qyzmetin ýaqytsha toqtatý boıynsha usynys jasaǵan.
"Alaıda balalar men jasóspirimderge arnalǵan «Ulttyq (Halyqtyq) bıler» úıirmesi boıynsha memleket qarjysy esebinen tegin qyzmet usynatyn dara kásipker «Infınıtı» óz qyzmetkerleri men balalar ómirin, densaýlyǵyn qaýipke tigip jumysyn jalǵastyra bergen. Dál osy dara kásipker «Infınıtı» qańtar aıynyń sońynda Mádenıet basqarmasyna tótenshe jaǵdaı rejımi ýaqytynda ótkizgen sabaqtaryna qarjy tóleýdi surap elektrondy esebin joldaǵan. Joǵaryda aıtylǵan Prezıdent Jarlyǵyn eskergen Mádenıet basqarmasy dara kásipker «Infınıtıge» tótenshe jaǵdaı rejıminde ótkizgen sabaqtarynyń zańsyz ekenin jáne qarjyny tolyqtaı tólemeýge májbúr ekenin eskertip, normatıvke baılanysty tótenshe jaǵdaı rejımi kezindegi dara kásipkerdiń ǵımaratyn jáne múlkin aǵymdaǵy qamtamasyz etýge arnalǵan shyǵyndaryn (jylý men jaryǵyna jáne t.b. jumsalǵan shyǵyndaryn) tólep beretinin jetkizgen. Dara kásipker «Infınıtı» Mádenıet basqarmasynyń bul eskertýlerine qanaǵattanbaı sotqa shaǵymdanǵan. Úsh aıǵa jýyq ýaqytqa sozylǵan sot isiniń aqyrynda sýdıa Romanenko Elena Vladımırovna Prezıdent Jarlyǵyn moıyndamaı, tótenshe jaǵdaı rejıminde ótkizilgen sabaqtardy zańdy dep sheshim shyǵardy", — dep jazdy jýrnalıst.
Madııar Eralyuly Prezıdent Jarlyǵyn ákimshilik sot sýdıasy moıyndamaıtyn elde memlekettik qyzmetshiler men qoǵamnyń arasynda alaýyzdyq kóbeıetindigin jetkizip, alańdaýshylyq bildirdi.
"Adyrna" ulttyq portaly.
