كوميسسيا توراعاسى، پرەزيدەنت اكىمشىلىگى باسشىسىنىڭ ورىنباسارى ايدا بالاەۆا وتىرىستى اشىق دەپ جاريالاپ، كوميسسيا جۇمىسىنىڭ نەگىزگى باسىمدىعى – ادامگەرشىلىك-وتباسىلىق قۇندىلىقتاردى نىعايتۋ، بالالاردىڭ قۇقىقتارى مەن زاڭدى مۇددەلەرىن قورعاۋ، ايەلدەردىڭ قۇقىقتارى مەن مۇمكىندىكتەرىن كەڭەيتۋ جونىندەگى مىندەتتەر ەكەنىن ايتتى.
«قۇجات مەملەكەتتىك وتباسى، دەموگرافيالىق جانە گەندەرلىك ساياسات سالاسىنداعى وزەكتى مىندەتتەردى ايشىقتاۋعا باعىتتالعان باستامالار توپتاماسىن قاراستىرادى. ولاردىڭ قاتارىندا، انا مەن بالا ءولىمىن ازايتۋ، جاسوسپىرىمدەر اراسىنداعى الىمجەتتىلىك پەن ءسۋيتسيدتىڭ الدىن الۋ، جىنىستىق زورلىق كورسەتۋ قىلمىستارىنان قورعاۋ، گەندەرلىك ءبىلىم ورتالىعىن قۇرۋ جانە ت.ب. تاقىرىپتار بار»، - دەدى ا. بالاەۆا.
سونىمەن قاتار، پروبلەمالىق ماسەلەلەردى شەشۋ ءۇشىن ۇلتتىق كوميسسيا الاڭىندا مەملەكەتتىك ورگانداردى جەدەل تىڭداۋ كەستەسى قالىپتاستىرىلدى.
جوسپاردا كوميسسيانىڭ ساراپتامالىق-تالداۋ جۇمىسىن جۇرگىزۋ قۇرالدارى مەن تەتىكتەرىنىڭ كەڭ سپەكترى كوزدەلگەن. اتاپ ايتقاندا، ءتۇرلى بەيىمدەۋ جانە الەۋمەتتىك قولداۋ ورتالىقتارىن ادىستەمەلىك سۇيەمەلدەۋ قامتاماسىز ەتىلەدى، قيىن ومىرلىك جاعدايعا تاپ بولعان بالالار مەن انالارعا قاجەتتى كومەك كورسەتۋ مۇمكىندىگىن قامتاماسىز ەتەتىن وتباسىلاردىڭ الەۋمەتتىك كارتاسى جاسالادى.
كۇن ءتارتىبى اياسىندا بالالار مەن جاسوسپىرىمدەرگە رۋحاني-ادامگەرشىلىك تاربيە بەرۋ ماسەلەسى دە قارالدى. كامەلەتكە تولماعاندار اراسىنداعى تۇرمىستىق زورلىق-زومبىلىق پەن قىلمىستىڭ الدىن الۋعا، بالالارعا قاتىستى قۇقىق قورعاۋ قۇرالدارىن دامىتۋعا باعىتتالعان پروفيلاكتيكالىق شارالار كەشەنى ۇسىنىلدى. سونىمەن قاتار، اتا-انالار ءۇشىن ءوز بالالارىن تاربيەلەۋمەن كوبىرەك اينالىسۋعا مۇمكىندىكتەر جاساۋعا ىقپال ەتەتىن قۇقىقتىق ورتانى دامىتۋ بويىنشا ناقتى شارالار ۇسىنىلدى.
اقپارات جانە قوعامدىق دامۋ ۆيتسە-ءمينيسترى ا.س. دانيلوۆ ورتالىق جانە جەرگىلىكتى دەڭگەيلەردەگى مەملەكەتتىك باسقارۋ جۇيەسىندە ايەل باسشىلاردىڭ الەۋەتىن ارتتىرۋ بويىنشا جوبانى ىسكە اسىرۋدى ۇسىندى.
«جوبانى قر پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ەگيداسى اياسىندا بۇۇ-نىڭ ايەلدەر قۇرىلىمىمەن بىرلەسىپ ىسكە اسىرۋ جوسپارلانىپ وتىر. جوباعا ءتۇرلى ساراپشىلار توبى مەن باسقا دا حالىقارالىق ۇيىمداردى تارتۋ كوزدەلۋدە. جوبا اياسىندا ەلدىڭ بارلىق ايماعىنداعى ايەلدەر مەن قىزدارعا ارنالعان وقىتۋ ءىس-شارالارى وتكىزىلەدى (سەمينارلار، ترەنينگتەر، شەبەرلىك ساباقتارى كوۋچ سەسسيالار). جوبا بيىلعى جىلدىڭ شىلدە ايىندا باستالادى. اتالعان جوبا ەلدىڭ ساياسي جانە قوعامدىق ومىرىندەگى ايەلدەردىڭ ءرولىن كۇشەيتۋگە سەپتىگىن تيگىزەدى»، دەپ اتاپ ءوتتى.
سونىمەن قاتار، ۇلتتىق كوميسسيا مۇشەلەرى – ريزا مولداشەۆا مەن (اباي وبلىسىنان، «سەمەي تاڭى» گازەتىنىڭ باس رەداكتورى) ءلازات قوجاحمەتوۆانىڭ («تالبەسىك» كوپ بالالى انالار وداعى» قب باسشىسى) بايانداماسى تىڭدالدى. .
ولار وتباسى، مەكتەپ جانە قوعام اراسىنداعى بايلانىستى نىعايتۋ تەتىكتەرىن كەڭەيتۋ جونىندە ۇسىنىستار ايتىپ، وتباسىلىق قۇندىلىقتاردى نىعايتۋ، بالا تاربيەسىندەگى اكە ينستيتۋتى ماسەلەلەرىنە، پروبلەمالىق ماسەلەلەردى شەشۋ مونيتورينگىنە جانە وسى باعىتتاعى كوميسسيا قىزمەتىنىڭ پەرسپەكتيۆالارىنا نازار اۋداردى.
«بۇگىن ءبىز ازاماتتىق قوعامنىڭ بارلىق ينستيتۋتتارىن تارتا وتىرىپ، پرەزيدەنتتىڭ گەندەرلىك ساياسات سالاسى مەن بارلىعىنا تەڭ مۇمكىندىك بەرۋگە ارنالعان رەفورماسىن ارى قاراي ىسكە اسىرۋعا قاجەتتى كەشەندى قادامدار قامتىلعان جوسپاردى بەكىتتىك. كوميسسيا جوسپاردا كورسەتىلگەن بارلىق باعىت بويىنشا قوعاممەن بارىنشا اشىق جانە جان-جاقتى بايلانىس ورناتىپ، الداعى ورتاق جۇمىسىمىزدا الدىن-الۋ شارالارىنا ۇلكەن ءمان بەرۋ كەرەك» دەدى ايدا بالاەۆا.
وتىرىس سوڭىندا ۇلتتىق كوميسسيا توراعاسى مەملەكەتتىك ورگاندارعا بىرقاتار تاپسىرمالار بەردى.
"ادىرنا" ۇلتتىق پورتالى.
